افغان آرمی کے کمانڈر سمیت 46 اہلکار پاک فوج کی پناہ میں آگئے
آئی ایس پی آر حکام کاکہنا ہے کہ پاک فوج نے افغان آرمی کے کمانڈر سمیت چھیالیس افغان اہلکاروں کو پناہ دے دی، اور فوجی روایات کے مطابق افغان اہلکاروں کو خوراک اور ضروری سہولتیں بھی فراہم کی گئیں۔
پاکستانی فوج کے شعبہ تعلقات عامہ (آئی ایس پی آر) کے مطابق چترال کے ارندو سیکٹر کے پاس پاک افغان بارڈر پر تعینات افغان فوجی کمانڈر نے پناہ کیلئے پاک فوج کے ساتھ رابطہ کیا، جس میں افغان فوج اور بارڈر پولیس کے پانچ افسروں سمیت چھیالیس اہلکاروں کیلئے پناہ اور محفوظ راستے کی درخواست کی۔ افغان کمانڈرکی درخواست پر پاک فوج کی طرف سے افغان حکام سے رابطہ کیا گیا ، جس کے بعد افغان فوجیوں کو پاکستان میں داخلے کی اجازت دے دی گئی اور فوجی روایات کے مطابق افغان اہلکاروں کو خوراک اور ضروری طبی سہولیات فراہم کی گئیں۔
ترجمان پاک فوج نے مزید کہا ہے کہ جلد باضابطہ اور باوقار طریقہ کار کے تحت افغان اہلکاروں کو افغان حکام کے حوالے کردیا جائے گا۔اس سے قبل یکم جولائی کو بھی پینتیس افغان فوجیوں نے پاک فوج سے پناہ طلب کی تھی، ان اہلکاروں کو بھی محفوظ پناہ فراہم کرنے کے بعد افغان حکام کے حوالے کردیا گیا تھا۔
آئی ایس پی آر کے مطابق ان سپاہیوں اور افسران کو ضروری کارروائی کے بعد باوقار طریقے سے افغان حکومت تک واپس پہنچایا جائے گا۔