اوور سیز پاکستانیز کی ویکسی نیشن کے لئےالگ کاونٹرز قائم
ڈپٹی کمشنرعلی شہزاد کی ہدایت پر اوور سیز پاکستانیز کی ویکسی نیشن کے لئے نشتر میڈیکل یونیورسٹی کے کورونا ویکسی نیشن سنٹر میں علیحدہ کاونٹر قائم کردیا گیا ہے۔
یہ سنٹر24 گھنٹے کھلا رہے گا۔ڈپٹی کمشنر علی شہزاد نے نشتر میڈیکل یونیورسٹی میں قائم ویکسی نیشن سنٹر کا دورہ کیا۔اسسٹنٹ کمشنر سٹی خواجہ عمیرمحمود اور ایم ایس نشتر ہسپتال ڈاکٹرشاہد محمود بخاری بھی انکے ہمراہ تھے۔ڈپٹی کمشنر نے اوور سیز پاکستانیز کے لئے قائم کاونٹر کو وزٹ کیا اور انتظامات کا جائزہ لیا۔
انہوں نے بیرون ملک جانیوالے پاکستانیوں سے گفتگو کرتے ہوئے کہا کہ اوور سیز پاکستانیز وزیر اعظم عمران خان کے دل کے بہت قریب ہیں اور بیرون ملک پاکستانیوں کے مسائل کا حل حکومت کی اولین ترجیحات میں شامل ہے۔ انہوں نے کہا کہ دیار غیر میں رہنے والے پاکستانی کثیر ترسیلات زر وطن بھیجتے ہیں،جس کا ملکی معیشت کے استحکام میں بڑا حصہ ہے۔انہوں نے کہا کہ نشتر میڈیکل یونیورسٹی میں علیحدہ کاونٹر کے قیام سے اوور سیز پاکستانیوں کی ویکسی نیشن کا عمل آسان کردیا گیا ہے، ویکسی نیشن سنٹر میں ویٹنگ رومز اور آبزرویشن رومز قائم کئے گئے ہیں جبکہ وسیع پارکنگ اور پینے کے صاف پانی کا انتظام بھی موجود ہے،ڈپٹی کمشنر نے بتایا کہ نشتر میڈیکل یونیورسٹی میں قائم اس سنٹر میں عام شہریوں کی کے لئے بھی24 گھنٹے ویکسی نیشن کی سہولت دستیاب ہے۔ویکسی نیشن سنٹر میں مرد اور خواتین کے لئے علیحدہ علیحدہ کاونٹر قائم کئے گئے ہیں۔
علی شہزاد نے بتایا کہ حکومت کی طرف سے ضلع ملتان کے لئے ویکسین کی ترسیل شروع کردی گئی ہے اور شہریوں کی ویکسی نیشن کا عمل دوبارہ تیز کیا جارہا ہے۔