جنوبی پنجاب کے عوام کیلئے الگ سیکرٹریٹ کے تعمیراتی منصوبے کا آغاز
وزیراعلی پنجاب عثمان بزدار کے ویژن کے تحت جنوبی پنجاب کے عوام کیلئے الگ سیکرٹریٹ کے تعمیراتی منصوبے کا آغاز کردیا گیا ہے ، اس سلسلے میں تعمیراتی کمپنی کی جانب سے سیکرٹریٹ کی مجوزہ جگہ متی تل پر تکنیکی کام کا باضابطہ آغاز کردیا گیا ہے۔
اس ضمن میں گزشتہ روز ایڈیشنل چیف سیکرٹری جنوبی پنجاب کیپٹن ر ثاقب ظفر نے متی تل میں سیکرٹریٹ کی سائٹ کا دورہ کیا ، اور تعمیراتی منصوبے کے حوالے سے بریفننگ لی۔
اس موقع پر ڈپٹی کمشنر علی شہزاد ، ایڈیشنل سیکرٹری آئی اینڈ سی جنوبی پنجاب کیپٹن رضوان قدیر اور ریونیو افسران بھی انکے ہمراہ تھے۔
ضلعی انتظامیہ کی جانب سے ایڈیشنل ڈپٹی کمشنر ریونیو طیب خان اور اے سی سٹی خواجہ عمیر محمود بھی موجود تھے۔
ایڈیشنل چیف سیکرٹری جنوبی پنجاب کیپٹن ر ثاقب ظفر نے جنوبی پنجاب سیکرٹریٹ کے تعمیراتی کام کے آغاز بارے بریفننگ لیتے ہوئے کہا کہ حکومت پنجاب کے ویژن کے مطابق جلد ازجلد سیکرٹریٹ کو۔فعال کرنے کیلئے تعمیراتی ادارے آئی ڈیپ کو مقررہ مدت میں پراجیکٹ مکمل کرنے کی ہدایت کی ہے۔
متی تل سول سیکرٹریٹ 404 کنال پر مشتمل مثالی سہولیات سے آراستہ سیکرٹریٹ ہوگا جس میں تمام محکموں کے کا مکمل انتظامی سیٹ اپ فعال کیا جائے گا تاکہ ایک ہی چھت تلے اس خطے کے عوام کو سہولیات فراہم کی جاسکیں۔
کیپٹن ر ثاقب ظفر نے کہا کہ ملتان سیکرٹریٹ بلڈنگ کی تعمیر پر 2.4 بلین روپے لاگت آئے گی، ابتدائی طور پر منصوبہ کے کام کے آغاز کے لیے 90 کروڑ روپے کے فنڈز موصول ہوچکے ہیں۔
ایڈیشنل چیف سیکرٹری کا کہنا تھا کہ سیکرٹریٹ کی بلڈنگ کو 2 سال کی قلیل مدت میں مکمل کیا جائے گا ،اور سیکرٹریٹ کی بلڈنگ کے تعمراتی کام میں کوالٹی کو ہر صورت یقینی بنایا جائے گا۔