سب ڈویژنوں کی حدود میں رکھے ٹرانسفارمرز فوری طورپر سٹورز میں جمع کرانے کاحکم
ایڈیشنل چیف انجینئر میپکو بہاولپور سرکل عبدالکریم جمالی نے کہا ہے کہ سب ڈویژنوں کی حدود میں رکھے ٹرانسفارمرز فوری طورپر سٹورز بھجوائے جائیں اور ٹوفیز پر چلنے والے ٹرانسفارمرز کی مرمت کروائی جائے تاکہ صارفین کو موسم گرما میں بجلی فراہمی میں تعطل کا سامنا نہ کرناپڑے۔
انہوں نے بغداد الجدید سب ڈویژن بہاولپور کے زیر انتظام شکایات مراکز کا دورہ کیا اور وہاں درج ہونے والی شکایات کا جائزہ لیا۔
ایڈیشنل چیف انجینئر نے لائن مینوں کا ڈیوٹی رجسٹر چیک کیا اور انہیں ہدایت کی کہ ٹی اینڈ پی کے بغیر لائنوں پر ہرگز کام نہ کیاجائے اور صارفین کی شکایات کا کم سے کم وقت میں ازالہ ممکن بنایاجائے۔
انہوں نے سب ڈویژنوں کے لائن سپروائزرز کو ہدایت کی کہ ٹرانسفارمرز کی مرمت اور لائنوں پر کام کے دوران موقع پر موجودگی یقینی بنائی جائے۔ صارفین سے خوش اخلاقی سے پیش آیاجائے۔
ایڈیشنل چیف انجینئر نے مستقل نادہندگان کے خلاف بہترین ریکوری کرنے پر بغدادالجدید سب ڈویژن کے لائن مین سکندر حیات کو نقد انعام دیا اور شکایت سنٹر کی کارکردگی کو بہتر پانے پر سٹاف کو شاباش دی۔
