حکومت پنجاب کو ملتان کے عوام پر ترس آہی گیا خوار ہوتی عوام کی سہولت کے لئے ملتان شہر میں ایک اور کورونا ویکسی نیشن سنٹر قائم کرنے کا فیصلہ کیا گیا ہے۔
ڈپٹی کمشنر علی شہزاد نے گزشتہ روز ڈی ایچ ڈی سی، ڈی ایچ کیو ہسپتال اور قائد اعظم اکیڈمی فار ایجوکیشنل ڈویلپمنٹ بوسن روڈ کا دورہ کیا۔اسسٹنٹ کمشنر سٹی خواجہ عمیرمحمود اور سی ای او ہیلتھ ڈاکٹر ارشد ملک بھی انکے ہمراہ تھے۔ڈپٹی کمشنر نے قائد اعظم اکیڈمی فار ایجوکیشنل ڈویلپمنٹ کو کورونا ویکسی نیشن سنٹر کے لئے موضوع قرار دیا ان کا کہنا ہے کہ ڈی ایچ ڈی سی میں قائم کورونا سنٹر میں رش کی وجہ سے شہریوں کو انتظار کا سامنا کرنا پڑتا ہے۔قائداعظم اکیڈمی کی بلڈنگ بڑی شاہراہ پر واقع ہے اور شہریوں کو یہاں سہل رسائی حاصل ہو گی۔
اس کے علاوہ قائد اعظم اکیڈمی میں کشادہ پارکنگ اور دیگر سہولیات بھی موجود ہیں۔نئے سنٹر کے قیام کے لئے حکومت پنجاب کو تجویز ارسال کی جارہی ہے۔حکومت پنجاب سنٹر کی منظوری کے بعد نادرا کو اس نئے سنٹر بارے آگاہ کرے گی۔انہوں نے کہا کہ ڈیمانڈ کو مدنظر رکھتے ہوئے شہر میں مزید نئے سنٹر مرحلہ وار قائم کئے جائیں گے۔سی ای او ہیلتھ ڈاکٹر ارشد ملک نے اس موقع پر بریفنگ دیتے ہوئے بتایا کہ ضلع ملتان میں کورونا ویکسی نیشن کے لئے22170 افراد کی رجسٹریشن کی جاچکی ہے۔اب تک6908 شہریوں کو کورونا ویکسین کی پہلی ڈوز جبکہ 424 افراد کو ویکسین کی دوسری ڈوز بھی دے دی گئی ہے۔شہر میں ایک اور سنٹر کے قیام سے ویکسی نیشن کا عمل تیز ہو جائے گا۔