میپکو کے رننگ اور ڈیڈ ڈیفالٹرز سے واجبات کی وصولی ہرحال میں یقینی بنائی جائے
سپریٹنڈنگ انجینئر میپکو ڈی جی خان سرکل آصف جان مروت نے کہا ہے کہ رننگ اور ڈیڈڈیفالٹرز سے واجبات وصول کرنے کے لئے ہرممکن اقدامات بروئے کار لائے جائیں۔
واجبات/بقایاجات کی عدم ادائیگی پر نادہندگان سے کوئی رعایت نہ برتی جائے اور ادائیگیاں نہ کرنے والے صارفین کے کنکشنز فوری طورپر منقطع کئے جائیں۔ اگر کسی ڈیڈ ڈیفالٹر کا کنکشن موقع پر چلتا ہوا پایا گیا تو متعلقہ اہلکاروں اور ایس ڈی اوز کے خلاف سخت محکمانہ کاروائی کی جائے گی۔
انہوں نے گزشتہ روز سنگم سب ڈویژن ڈی جی خان کے زیر انتظام عالی والا اورملحقہ علاقوں میں واجبات کی ادائیگیاں کروانے کے لئے جاری آپریشن کی نگرانی کی۔ اس موقع پر ایس ڈی او سنگم سب ڈویژن امیر نواز بھی موجود تھے۔ انہوں نے کہا کہ سرکاری اداروں سے واجبات کی وصولیوں کے لئے سربراہان سے بات چیت کی جائے اور جون 2021ء کے ریکوری اہداف کا حصول ممکن بنایاجائے۔ ایس ڈی او سنگم سب ڈویژن امیرنواز نے ایس ای کو بریفنگ دیتے ہوئے بتایاکہ رواں ماہ کے دوران مستقل نادہندگان سے 8لاکھ29ہزارروپے واجبات وصول کرکے خزانے میں جمع کروائے گئے جبکہ اہداف کے حصول کے لئے دن رات ریکوری مہم جاری ہے۔