علامہ اقبال اوپن یونیورسٹی میں یوم تشکر منایا گیا

علامہ اقبال اوپن یونیورسٹی ریجنل کیمپس ملتان میں ریجنل ڈائریکٹر ملتان غلام حسین کھوسہ کی زیر سرپرستی یوم تشکر کے حوالے سے ایک سیمینار منعقد کیا گیا۔

ریجنل ڈائریکٹر ملتان غلام حسین نے سیمینار سے خطاب کرتے ہوئے کہا کہ آج ہم سب یہاں ایک عظیم کامیابی اور تاریخی لمحے کے اظہار تشکر کے لیے جمع ہوئے ہیں پاکستان نے ایک بار پھر ثابت کر دیا کہ ہم ایک زندہ قوم ہیں اور ایک با ہمت قوم ہیں اور اپنے دفاع کے لیے ہر قربانی دینے والی قوم ہیں۔

حال ہی میں بھارت کی جانب سے جارحیت اور حملے کئے گئے،مگر ہماری بہادر افواج نے دشمن کے ناپاک عزائم کو نہ صرف ناکام بنایا بلکہ دشمن کو ایسا سبق سکھایا جسے تاریخ ہمیشہ یاد رکھے گی یہ فتح صرف میدان جنگ کی فتح نہیں، یہ حق کی باطل پر،استقلال کی ظلم پر اور جذبہ ایمانی کی تکبر پر فتح ہے۔