گرلز سکولوں میں طالبات کو محفوظ رکھنے کےلئے انسداد ہراسگی کمیٹیاں بنانے کا فیصلہ

پنجاب کے سرکاری سکولوں میں طالبات کیلئے محفوظ اور باعزت تعلیمی ماحول یقینی بنانے کے لیے تمام سرکاری اداروں میں ہراسگی کمیٹیاں قائم کرنے کا فیصلہ کر لیا گیا۔

تفصیل کے مطابق محکمہ سکولز نے گرلز سکولوں میں طالبات کو محفوظ رکھنے کےلئے انسداد ہراسگی کمیٹیاں بنانے کافیصلہ کیا ہے۔

جاری مراسلے کے مطابق سکول میں کم از کم 3 اساتذہ پر مشتمل ایک کمیٹی بنائی جائے گی،کمیٹی میں خواتین کی مناسب نمائندگی کو لازمی قرار دیا گیا ہے۔

اس کے علاوہ یہ کمیٹیاں جنسی ہراسگی کی شکایات کو خفیہ اور مؤثر انداز میں نمٹائیں گی،شکایات کا ریکارڈ ضلعی تعلیمی اتھارٹی کو ارسال کیا جائے گا۔

تمام اسکولوں کو ہدایت کی گئی ہے کہ وہ 30 دن کے اندر کمیٹیوں کی رپورٹ محکمہ تعلیم کو جمع کرائیں۔