قربانی کی کھالیں اکھٹی کرنے پر پابندی

ڈپٹی کمشنر ملتان محمد طاہر وٹو نے کہا ہے کہ عیدالاضحیٰ کے موقع پر بغیر اجازت قربانی کی کھالیں اکھٹی کرنے پر پابندی ہوگی، کسی بھی کالعدم تنظیم کو قربانی کی کھالیں اکھٹی کرنے نہیں دینگے۔

انہوں نے کہا کہ ڈپٹی کمشنر آفس کی جانب سے کھالیں جمع کرنے کے این او سیز کی پڑتال کا آغاز بھی کردیا گیا ہے۔

اس سلسلے میں جانوروں کی کھالیں اکھٹی کرنے کے خواہشمند افراد و تنظیموں کی 28 جون تک رجسٹریشن کی جائے گی۔

اس حوالے سے درخواستیں 28 جون تک ڈپٹی کمشنر آفس جمع کرائی جاسکتی ہیں۔

طاہر وٹو کا کہنا تھا کہ درخواست گزار کیلئے شناختی کارڈ کاپی، کالعدم تنظیم سے لاتعلقی کا سٹامپ پیپر ، سابقہ سال کا این او سی اور ادارے کی رجسٹریشن فراہم کرنا ضروری ہوگی۔

ڈپٹی کمشنر نے کہا کہ کالعدم تنظیموں کو کسی صورت کھالیں اکھٹے کرنے کی اجازت نہیں دے جائے گی۔