زکریا یونیورسٹی : انتظامیہ اور ایمپلائیز یونین کے درمیان مذاکرات کامیاب، تمام واجبات اور عید بونس دینے کا اصولی فیصلہ
زکریا یونیورسٹی کے ایمپلائیز کا چار روز سے جاری احتجاج رنگ لے آیا، جمعرات کی صبح یونیورسٹی انتظامیہ اور ایمپلائیز یونینز کے درمیان ہونے والے مذاکرات کامیاب رہے، جس کے نتیجے میں اصولی فیصلہ کیا گیا کہ ملازمین کو تمام واجبات اور عید بونس جمعے کی شام تک ان کے اکاؤنٹس میں منتقل کر دیے جائیں گے۔
ذرائع کا کہنا ہے کہ زکریا یونیورسٹی کے سالانہ عید بونس اور واجبات کی وصولی کے لیے بدھ کو ہونے والے بڑے احتجاج کے بعد انتظامیہ بھی مذاکرات کی ٹیبل پر آگئی، مذاکرات میں تمام لیڈران جن میں ایمپلائیز یونین کے صدر غلام حر غوری، سیکرٹری ندیم بوسن تھری ایم ایم کے صدر ملک صفدر حسین سیکٹری رانا مدثر مشتاق جبکہ ایمپلائز گروپ کے شاہد ریاض موتھا اور قاسم سنجرانی اپنے ساتھیوں کے ساتھ ایڈمن بلاک کے سامنے اکٹھے ہو گئے اور نعرے بازی شروع کر دی۔
ان کا کہنا تھا کہ 10 بجے تک اگر ان کے مطالبات تسلیم نہ کیے تو تمام ٹرانسپورٹ بند کردی جائے گی اور ایڈمن بلاک کی تالہ بندی کے بعد وی سی افس کا گھیراؤ کیا جائے گا، جس کے بعد ریزیڈنٹ افیسر پروفیسر ڈاکٹر مقرب اکبر اور چیف سیکورٹی افیسر ڈاکٹر عثمان نے مذاکرات کیے جس کے نتیجے میں یہ طے پایا کہ ملازمین کے تمام مطالبات تسلیم کیے جاتے ہیں، تاہم قائم مقام ٹریژر کی تعیناتی تک انتظار کیا جائے گا۔
ملازمین کی بے یقینی کی کیفیت کو ختم کرنے کے لیے جمعہ کی صبح تک تمام واجبات ان کے بینک اکاؤنٹس میں منتقل کر دیے جائیں گے، جس کے بعد تمام ملازمین احتجاج موخر کر دیا تاہم ایڈمن بلاک کے سامنے موجود رہے۔
رجسٹرار نے وائس چانسلر کی مشاورت کے بعد قائم مقام تیار خزانہ دار کی تعیناتی کا فیصلہ کر لیا، وی افس کا کہنا ہے کہ وائس چانسلر پہلے ہی بونس دینا چاہتے تھے کچھ قانونی مسائل تھے جس کی وجہ تاخیر ہوئی تاہم آج جمعہ کو ادائیگیاں ہو جائیں گی۔
