ملتان سمیت پنجاب بھر کے کالجز میں امتحانات آج سے شروع، طلباء کی شرکت لازمی قرار
پنجاب بھر کے کالجز میں آج سے امتحانات شروع ہوگئے۔
رواں برس ہائیر ایجوکیشن ڈیپارٹمنٹ کی طر ف سے امتحانات کے انعقاد کو یقینی بنانے اور طالب علموں کے لیے انہیں سنجیدگی سے لینے کی خاطر جاری ہونے والے اکیڈمک کیلنڈر میں امتحانات کو خاص اہمیت دی جا رہی ہے۔
آج سے شروع ہونے والےامتحانات کے بارے میں جاری ایس او پیز کےمطابق تمام طلباء کا اس میں شرکت کرنا لازم ہے، امتحانات میں شرکت نہ کرنے والے طالب علموں کو دو سو روپے فی پیپر جرمانہ ہوگا، بیماری کی بنیاد پر ٹیسٹوں سے غیر حاضر بچوں کو گورنمنٹ کے ہسپتال کے سپرنٹینڈنٹ یا مجاز اتھارٹی سے سرٹیفکیٹ مہیا کرنا ہوگا۔
امتحانات کے دوران نقل کرنے والے طالب علموں پر کیسز بنا کر کالج کونسل میں سزا کے لیے پیش کیے جائیں گے اور یہ فیصلہ کسی عدالت میں چیلنج نہیں کیے جا سکیں گے، امتحانات کے متعلق تمام ریکارڈ کو محفوظ رکھا جائے گا اور دوران معائنہ اعلی حکام کو دیکھایا جائے گا۔
تمام امتحانات میں پاس مارکس 40 فیصد مقرر کیے گئے ہیں 24 اکتوبر 2025 سے شروع ہونے والے ٹیسٹ کے نتائج ڈائریکٹر پبلک انسٹرکشن پنجاب کے دفتر میں 8 نومبر تک پہنچانے جائیں گے، دوران سال اول و دوم کالج کے امتحانات میں غیر حاضر رہنے والے طالب علموں اور کالج میں پچھتر فیصد حاضریاں پوری نہ کرنے والوں کا بورڈ امتحان کے لیے داخلہ روک لیا جائے گا۔
علاوہ ازیں ایسے طلباء جنہوں نے ایگزمینیشن کے دوران دو یا دو سے زائد مضامین میں ،،ایف،، گریڈ لئے ہوں ان کا داخلہ بھی روک لیا جائے گا۔
