پرائیویٹ سکولوں کو فیس میں اضافے سے روک دیاگیا
چیف ایگزیکٹیو آفیسر تعلیم و سیکرٹری رجسٹریشن اتھارٹی ملتان نے سپریم کورٹ آف پاکستان اور لاہور ہائیکورٹ کے فیصلے کی رو سے تمام نجی تعلیمی اداروں کے مالکان اور پرنسپلز کو ہدایت کی ہے کہ وہ ٹیوشن فیس میں سالانہ 5 فیصد سے زائد اضافہ ہرگز نہ کریں، بصورت دیگر ان کے خلاف تادیبی کاروائی کی جائے گی۔
اپنے ایک تحریری اعلامیہ میں سی ای او ایجوکیشن ملتان نے کہا ہے کہ سالانہ پانچ فی صد اضافے کے لئے جنوری 2017ء کی فیس کو بنیاد بنایا جائے۔
اس سلسلے میں ایسے تمام نجی تعلیمی ادارے جن کی ماہانہ ٹیوشن فیس 4 ہزار یا اس سے زائد ہے وہ فوری طور پر ڈسٹرکٹ ایجوکیشن اتھارٹی سے اپنا فیس سٹرکچر نوٹیفائیڈ کرائیں۔
سی ای او ایجوکیشن نے کہا ہے کہ ایسے والدین جن کو فیس کے حوالے سے کسی قسم کی شکایت ہے وہ ڈسٹرکٹ ایجوکیشن اتھارٹی ملتان سے رابطہ کریں ان کی داد رسی کی جائے گی