پی ایس ایل 10 کے ٹکٹس کی فروخت 3 اپریل سے شروع ہوگی
ایچ بی ایل پاکستان سپر لیگ (پی ایس ایل) سیزن 10 کے ٹکٹس کی فروخت 3 اپریل سے شروع ہوگی۔ شائقین آن لائن بکنگ کے لیے PCB.tcs.com.pk پر سہ پہر 3 بجے سے ٹکٹس حاصل کر سکیں گے، جبکہ فزیکل ٹکٹس 7 اپریل سے ملک بھر کے ٹی سی ایس ایکسپریس سینٹرز پر دستیاب ہوں گے۔
آن لائن بک کیے گئے ٹکٹس ٹی سی ایس کے مقرر کردہ پک اپ پوائنٹس سے حاصل کیے جا سکتے ہیں یا ڈیلیوری کے ذریعے گھروں تک پہنچائے جائیں گے۔
ایچ بی ایل پی ایس ایل 10 کے میچز کراچی، لاہور، ملتان اور راولپنڈی میں کھیلے جائیں گے، جبکہ ایونٹ کا فائنل 18 مئی کو قذافی اسٹیڈیم، لاہور میں ہوگا۔
تمام وینیوز کے عام ٹکٹس 650 روپے میں دستیاب ہوں گے، جبکہ افتتاحی میچ، جو اسلام آباد یونائیٹڈ اور لاہور قلندرز کے درمیان راولپنڈی کرکٹ اسٹیڈیم میں کھیلا جائے گا، اس کے ٹکٹس 1000 سے 8500 روپے تک ہوں گے۔
پاکستان کرکٹ بورڈ (پی سی بی) نے شائقین کی دلچسپی بڑھانے کے لیے ہر میچ کے دوران "ٹکٹ ریفل” کا انعقاد کرنے کا اعلان بھی کیا ہے، جس میں فاتح شائقین کو خصوصی انعامات دیے جائیں گے۔
اس بارے میں بورڈ حکام کا کہنا ہے کہ مزید تفصیلات جلد جاری کی جائیں گی۔
