یوم کشمیر پر ہاکی میچز کرانے کا فیصلہ
سپورٹس ڈیپارٹمنٹ ملتان کے زیر اہتمام حکومت پنجاب اور کمشنر ملتان ڈویژن کی خصوصی ہدایت پر پانچ فروری یوم یکجہتی کشمیر کے سلسلہ میں ہزراہ کمبائینڈ/ہزارہ ہاکی کلب کوئٹہ اور جانباز کلب میاں چنوں کے درمیان پانچ فروری کو جبکہ ہزارہ کمبائنڈ /ہزارہ ہاکی کلب کوئٹہ اور ملتان کے درمیان دوسرا میچ چھ فروری کو کھیلا جا ئے گا۔
ان خیالات کا اظہار رانا ندیم انجم ڈویژنل سپورٹس آفیسر ملتان نے یوم کشمیر کے موقع پر مختلف کھیلوں کے مقابلہ جات کے شیڈول سے آگاہ کرتے ہوئے کیا۔
اس موقع پر ڈسڑکٹ سپورٹس آفیسر ملتان فاروق لطیف بھی ان کے ہمراہ موجود تھے۔
رانا ندیم انجم نے بتایا کہ مظلوم کشمیری بھائی جو کہ بھارتی ظلم و ستم کی چکی میں پس رہے ہیں ، پانچ فروری کا دن ان مظلوموں کے ساتھ یکجہتی کے طور پر منایا جاتا ہے ۔
اس دن کو خصوصی طور پر منانے کا مقصد دنیا کو بھارت کے غاصبانہ تسلط سے کشمیر کو آزادی دلانہ ہے۔خصوصی دن کی مناسبت پر ہزراہ بلوچستان سے ہاکی ٹیم خصوصی طور پر قلب رضا لیجنڈ ہاکی پلئیر اور فقیر حسین کی قیادت میں تشریف لائی ہے، جن کو ہم ملتان آمد پر خوش آمدید کہتے ہیں۔
ہاکی کے میچز آسڑو ٹرف ہاکی اسٹیڈیم متی تل روڈ ملتان میں کھیلے جائیں گے۔اس دن کی مناسبت سے ایک کرکٹ میچ سپورٹس گراؤنڈ ملتان میں کھیلا جائے گا ۔
جبکہ سپورٹس ڈیپارٹمنٹ ملتان نے اس موقع پر سپیشل پرسن کے لیے ہینڈ بال ایونٹ کا انعقاد کیا ہے۔جس کے مقابلہ جات باسکٹ بال ارینا میں کھیلے جائیں گے۔
