بھارتی فوج کا ہیلی کاپٹر گر کر تباہ ، جنرل بپن راوت کی ہلاکت کا خدشہ
نئی دہلی: بھارتی فضائیہ کا ہیلی کاپٹر تامل ناڈو میں گرکرتباہ ہوگیا جس کے نتیجے میں 11 افراد ہلاک اور 3 شدید زخمی ہوگئے، ہیلی کاپٹرمیں بھارت کے چیف آف ڈیفنس اسٹاف بپن راوت بھی اہلیہ سمیت سوار تھے۔
بھارتی میڈیا کے مطابق ہیلی کاپٹر میں بھارت کے چیف آف ڈیفنس اسٹاف بپن راوت اور ان کی اہلیہ سمیت 14 افراد سوارتھے۔ حادثے میں 11 افرادکی ہلاکت کی تصدیق ہوگئی جبکہ 3 افراد کوشدید زخمی حالت میں اسپتال منتقل کردیا گیا۔
بھارتی فوجی حکام نے ہیلی کاپٹرحادثے میں سابق آرمی چیف اور موجودہ ڈیفنس چیف آف اسٹاف بپن راوت کے ہلاک یا زخمی ہونے سے متعلق کچھ نہیں بتایا تاہم خدشہ ظاہر کیا جا رہا ہے کہ جنرل بپن راوت حادثے میں ہلاک ہوگئے ہیں۔
بھارتی میڈیا کے مطابق بھارتی فضائیہ کا ہیلی کاپٹر ایئر فورس بیس سے آرمی ڈیفنس سروسز کالج جا رہا تھا کہ تمل ناڈو میں کنور کے قریب گر کر تباہ ہوا۔ بھارتی فضائیہ نے حادثے کی تحقیقات کے لیے انکوائری کمیٹی تشکیل دیدی ہے۔
An IAF Mi-17V5 helicopter, with CDS Gen Bipin Rawat on board, met with an accident today near Coonoor, Tamil Nadu.
An Inquiry has been ordered to ascertain the cause of the accident.— Indian Air Force (@IAF_MCC) December 8, 2021
سوشل میڈیا پر وائرل ہونے والی ویڈیوز میں دیکھا جا سکتا ہے کہ ہیلی کاپٹر ایک کالج نے نزدیک گھنے جنگل والے علاقے میں گرا ہوا ہے اور آگ کے شعلوں میں گھیرا ہوا ہے۔
بھارتی ائیرفورس کا کہنا ہے کہ حادثے کا شکار ہونے والے ہیلی کاپٹر میں جنرل بپن راوت اپنے اہل خانہ سمیت 14 افراد کے ہمراہ موجود تھے۔ حادثے کی وجوہات جاننے کے لیے تحقیقات کا حکم دے دیا گیا ہے۔
جبکہ حادثے کی اطلاع موصول ہوتے ہی مقامی فوجی جائے حادثہ پر پہنچ گئے۔
واضح رہے کہ جنرل بپن راوت بھارتی فوج کے سربراہ کے طور پر بھی اپنی خدمات سر انجام دیتے رہے، انہوں نے اپنی مدت ملازمت پوری کرنے کے بعد 31 دسمبر 2019ء کو ریٹائرمنٹ لی جس کے بعد مودی سرکار نے جنرل بپن راوت کو بھارت کا پہلا چیف آف ڈیفنس اسٹاف مقرر کیا تھا۔