ملتان سمیت پنجاب بھر کے تمام تعلیمی بورڈز نے میٹرک امتحانات 2026 کا شیڈول جاری کر دیا
صوبے کے تمام بورڈز آف انٹرمیڈیٹ اینڈ سیکنڈری ایجوکیشن نے شیڈول جاری کیا ہے، جس کے مطابق سیکنڈری اسکول سرٹیفکیٹ (ایس ایس سی) پارٹ ون اور پارٹ ٹو کے پہلے سالانہ امتحانات آئندہ سال 3 مارچ سے شروع ہوں گے۔
امیدواروں کو ہدایت کی گئی ہے کہ وہ اپنی درخواستیں صرف آن لائن سسٹم کے ذریعے جمع کرائیں، کیونکہ کسی بھی صورت میں دستی فارم یا ہاتھ سے جمع کرائے گئے چالان قبول نہیں کیے جائیں گے۔
شیڈول کے مطابق سنگل فیس کے ساتھ فارم جمع کرانے کی آخری تاریخ 27نومبر،ڈبل فیس کے ساتھ 11 دسمبر، تین گنافیس کے ساتھ 24 دسمبر مقرر کی گئی ہے ۔
اعلامیے میں مزید کہا گیا ہے کہ سرکاری اور نجی تعلیمی ادارے اپنے متعلقہ بورڈز کی سرکاری ویب سائٹس سے تفصیلی رہنمائی حاصل کریں۔
تمام اسکولوں کو پابند کیا گیا ہے کہ داخلہ فارم، پرنٹ شدہ کاپیاں اور بینک میں جمع شدہ فیس چالان متعلقہ بورڈز میں جمع کرائیں تاکہ کسی قسم کی تاخیر یا تکنیکی مسئلے سے بچا جا سکے
بورڈز کے حکام کا کہنا ہے کہ یہ اقدامات امتحانی نظام میں شفافیت، سہولت اور کارکردگی کو بہتر بنانے کے لیے کیے جا رہے ہیں۔ اس سے نہ صرف طلباء اور اسکول انتظامیہ کو آسانی ہوگی بلکہ پورے امتحانی عمل کو ڈیجیٹل نظام کے تحت زیادہ منظم اور مؤثر بنایا جا سکے گا۔
حکام کے مطابق، امتحانات کے شیڈول اور داخلہ فارم جمع کرانے کی آخری تاریخوں کی تفصیلات جلد تمام بورڈز کی ویب سائٹس پر دستیاب ہوں گی۔ طلباء اور والدین کو مشورہ دیا گیا ہے کہ وہ کسی بھی دشواری سے بچنے کے لیے آن لائن فارم مقررہ مدت کے اندر جمع کرائیں تاکہ رول نمبر سلپس اور دیگر امتحانی کارروائیاں بروقت مکمل کی جا سکیں۔
ذرائع کے مطابق، پنجاب کے تمام نو تعلیمی بورڈز، بشمول لاہور، راولپنڈی، فیصل آباد، گوجرانوالہ، ملتان، بہاولپور، ساہیوال، ڈی جی خان اور سرگودھا، اس مشترکہ شیڈول پر عمل کریں گے۔
