ایمرسن یونیورسٹی اور فیصل بینک میں ایم او یو سائن ہوگیا
ایمرسن یونیورسٹی ملتان اور فیصل بینک کے درمیان ایک اہم اشتراک عمل میں لانے کا فیصلہ کیا گیا ہے، جس کا مقصد پیشہ ورانہ ترقی، اسلامی فنانس کی تعلیم کے فروغ اور طلباء کے لیے روزگار کے مؤثر مواقع پیدا کرنا ہے۔
اس حوالے سے ایک اعلیٰ سطحی اجلاس منعقد ہوا جس میں ایمرسن یونیورسٹی کے وائس چانسلر پروفیسر ڈاکٹر محمد رمضان اور فیصل بینک کے ہیڈ آف لرننگ،ہیومن ریسورسز جناب اسد حمید نے شرکت کی۔ اجلاس میں دونوں اداروں کے درمیان ایک مفاہمتی یادداشت (MoU) کے مسودے پر تبادلہ خیال کیا گیا۔
مجوزہ یادداشت کے تحت فیصل بینک کے ملازمین کو ایمرسن یونیورسٹی میں تربیت فراہم کی جائے گی، جو کہ یونیورسٹی کے تجربہ کار اساتذہ کی زیر نگرانی ہوگی۔ اس کے علاوہ اسلامی فنانس پر آگاہی سیشنز کا انعقاد اور بینکنگ صنعت سے ہم آہنگ تعلیمی و تربیتی کورسز کی مشترکہ تیاری بھی معاہدے کا حصہ ہوں گے۔اس اشتراک کا ایک اہم پہلو طلبہ کے لیے مواقع کی فراہمی ہے، جن میں کیریئر سپورٹ سروسز، معاوضے کے ساتھ انٹرن شپ پروگرامز اور فیصل بینک کے معروف ینگ اسلامک بینکرز پروگرام (YIBP) کے تحت طلبہ کی شمولیت شامل ہے۔ اس پروگرام کا مقصد نوجوانوں کو عملی بینکاری کی تربیت دے کر اسلامی بینکاری کے شعبے میں کامیاب کیریئر کے لیے تیار کرنا ہے۔
اجلاس میں ایمرسن یونیورسٹی کے سینئر فیکلٹی ممبران ڈاکٹر سجاد نواز، ڈاکٹر نادر مگسی اور ڈاکٹر عرفان جاوید بھی موجود تھے.
