ایشیاء کپ: انتظامی افسروں کے دورے، ٹیموں کے روٹس کا معائنہ، سیکورٹی سخت

ایشیاء کپ کے لئے ملتان سٹیڈیم میں تیاریاں آخر مراحل میں داخل، ضلعی اور پولیس انتظامیہ کے دورے

تفصیل کے مطابق سی پی او ملتان منصور الحق رانا نے ڈپٹی کمشنر عمر جہانگیر کے ہمراہ ملتان کرکٹ اسٹیڈیم میں کھیلے جانے والے ایشیاء کپ کے افتتاحی میچ کے سیکیورٹی انتظامات کے سلسلے میں اسٹیڈیم اور روٹ کا وزٹ کیا۔

ایس ایس پی آپریشنز ملتان محمد عمران، ڈی ایس پی مخدوم رشید نعیم عباس، ایس ایچ او مخدوم رشید راشد ندیم، انچارج سیکیورٹی علی طاہر، پاک فوج اور حساس اداروں کے افسران سی پی او ملتان کے ہمراہ تھے۔

سی پی او ملتان نے پی سی بی انتظامیہ سے بھی ملاقات کی، ایس ایس پی آپریشنز ملتان محمد عمران نے سی پی او ملتان منصور الحق رانا کو سیکیورٹی انتظامات پر بریفنگ دی، سی پی او ملتان نے کرکٹ میچ کے پُرامن انعقاد کیلئے اہم احکامات جاری کیے۔

سی پی او ملتان منصور الحق کا اس موقع پر کہنا تھا کہ اس دوران فول پروف سیکیورٹی کو یقینی بنانے کے لیے تمام دستیاب وسائل بروئے کار لائے جائیں گے۔

سی پی او ملتان نے کہا کہ کھلاڑیوں اور میچ آفیشلز کے ساتھ ساتھ شائقین کرکٹ کی سیکیورٹی کو بھی مد نظر رکھا جائے گا، شہریوں کی سہولت اور ٹریفک کی بلا تعطل روانی کیلئے ٹریفک مینجمنٹ کا موثر پلان تشکیل دیا گیا ہے۔

ڈپٹی کمشنر ملتان عمر جہانگیر کا اس موقع پر کہنا تھا کہ ضلعی انتظامیہ ایشیا کرکٹ کپ کی میزبانی کیلئے مکمل تیار ہے۔ کرکٹ سٹیڈیم اور روٹس پر لائٹنگ اور صفائی و ستھرائی کے اقدامات شروع کردیے گئے ہیں۔

انہوں نے کہا کہ انٹرنیشل کرکٹ میلے کے افتتاحی میچ کی میزبانی اعزاز ہے، ڈپٹی کمشنر ملتان عمر جہانگیر نے مزید کہا کہ کرکٹ شائقین کیلئے خصوصی شٹل سروس اور پارکنگ کا انتظام کیا جائے گا۔ ٹکٹوں کی فروخت اور چیکنگ کے میکنزم کی کڑی نگرانی کرینگے۔

ڈپٹی کمشنر ملتان نے کہا کہ مہمان ٹیموں کا شہر کی کلچرل سجاوٹ کے ذریعے بھرپور استقبال ہوگا۔ ایشیاء کپ کا افتتاح میچ 30 اگست کو ملتان کرکٹ اسٹیڈیم میں کھیلا جائے گا۔