زکریا یونیورسٹی سمیت پنجاب بھر کی یونیورسٹیوں میں سمر کیمپ نہ لگانے کا فیصلہ، طلباء کی مشکلات بڑھ گئیں
پنجاب بھر کی مختلف جامعات میں زیر تعلیم ان طلباء کے لیے مشکلات بڑھتی جا رہی ہیں جن کے امتحانات میں سپلی (Supply) آئی ہے۔
یونیورسٹی انتظامیہ کی جانب سے ان طلبہ کو سمَر سمسٹر کی سہولت فراہم نہیں کی جا رہی جس کی وجہ سے والدین اور طلباء شدید ذہنی دباؤ کا شکار ہیں کیونکہ ان کا ایک تعلیمی سال ضائع ہونے کا خدشہ ہے۔
تاہم صرف زکریا یونیورسٹی نے سمر کیمپ مشروط طور پر آفر کیا ہے، تاہم اس کے امتحانات چھٹیوں کے بعد فزیکلی لئے جائیں گے لیکن ا س ماڈل پر اساتذہ اور طلبا و طالبات کی دلچسپی نہ ہونے کے برابر ہے۔
اساتذہ نے اس ماڈل میں سمسٹر کے پیسے نہ ملنے پر دلچسپی نہیں دکھائی جبکہ طلباء ٹیچرز کی عدم توجہی کی وجہ سے پریشان ہیں۔
متاثرہ سٹوڈنٹس اور ان کے والدین کا کہنا ہے کہ اگر سمَر سمسٹر آفر کر دیا جائے تو بچے اپنا کورس مکمل کر کے بروقت اپنی تعلیم جاری رکھ سکیں گے، ورنہ اگلے سال تک انتظار کرنا پڑے گا جس سے نہ صرف تعلیمی سال ضائع ہوگا بلکہ مالی بوجھ بھی بڑھے گا۔
کئی نجی یونیورسٹیوں میں سمَر سمسٹر کی سہولت موجود ہے لیکن سرکاری اداروں میں طلبہ کو اس سہولت سے محروم رکھا جا رہا ہے۔
والدین کا کہنا ہے کہ وہ مہنگائی کے اس دور میں پہلے ہی تعلیمی اخراجات کے بوجھ تلے دبے ہوئے ہیں، اور بچوں کی تعلیم میں مزید تاخیر ان کے لیے ناقابل برداشت ہے۔
انہوں نے وزیر اعلیٰ پنجاب مریم نواز شریف سے اپیل کی ہے کہ وہ اس معاملے میں فوری مداخلت کریں اور ہائیر ایجوکیشن کمیشن اور متعلقہ تعلیمی اداروں کو ہدایات جاری کریں کہ طلبہ کے مستقبل کو مدنظر رکھتے ہوئے فوری طور پر سمَر سمسٹر آفر کیا جائے۔
