ایمرسن یونیورسٹی ملتان میں پیف اسکالرشپ تقسیم کرنے کی تقریب کا انعقاد
تقریب میں ملتان چیمبر آف کامرس اینڈ انڈسٹری کے صدر میاں بختاور تنویر شیخ مہمان خصوصی تھے، تقریب میں وائس چانسلر پروفیسر ڈاکٹر محمد رمضان، اساتذہ اور طلباء کی بڑی تعداد نے شرکت کی۔ تقریب کے دوران 40 مستحق طلباء کو میاں بختاور تنویر شیخ اور وائس چانسلر کی جانب سے اسکالرشپ سرٹیفکیٹس سے نوازا گیا۔
میاں بختاور تنویر شیخ نے خطاب کرتے ہوئے پاکستان کی جغرافیائی اہمیت اور چار مختلف موسموں کی نعمت کو کاروبار اور اختراعات کے لیے ایک سنہری موقع قرار دیا۔ انہوں نے نوجوانوں میں کاروباری صلاحیتوں کو اجاگر کرنے کی ضرورت پر روشنی ڈالی، جو ملکی معیشت کے استحکام کے لیے کلیدی حیثیت رکھتی ہے۔
تقریب کے دوران میاں بختاور تنویر شیخ نے ایمرسن یونیورسٹی اور ملتان چیمبر آف کامرس اینڈ انڈسٹری کے درمیان اشتراک کے منصوبے کا اعلان کیا، جس میں صنعتوں میں انٹرن شپ پروگرامز، کاروباری منصوبے، معاہدات، یونیورسٹی-صنعت روابط، اور بزنس انکیوبیشن سینٹرز شامل ہوں گے۔
انہوں نے یقین دلایا کہ ملتان چیمبر ایمرسن یونیورسٹی کو بھرپور تعاون فراہم کرے گا تاکہ تعلیم کے معیار کو مزید بہتر بنایا جا سکے اور نوجوانوں کو اختراع اور کاروبار کے مواقع فراہم کیے جا سکیں۔
وائس چانسلر پروفیسر ڈاکٹر محمد رمضان نے تقریب سے خطاب کرتے ہوئےکہا کہ ایمرسن یونیورسٹی ہر طالب علم کی تعلیمی ضروریات کو پورا کرنے کے لیے پُرعزم ہے اور کوئی بھی طالب علم مالی وسائل کی کمی کے باعث تعلیم ترک کرنے پر مجبور نہیں ہوگا۔
ڈاکٹر رمضان نے مالی معاونت کی افسر ڈاکٹر قرۃ العین کی کوششوں کو سراہا، جنہوں نے میرٹ کی بنیاد پر طلباء کا انتخاب یقینی بنایا۔
