محکمہ پولیس بھی ثقافت کے رنگوں میں رنگا گیا

ریجنل پولیس آفیسر ملتان جاوید اکبر ریاض نے کہا ہے کہ کلچر ڈے منانے کا مقصد کسی بھی خطے کی ثقافت کو اجاگر کرنا، اور نئی نسل کو اس سے روشناس کرانا ہے۔
یہ بات انہوں نے پنجاب کلچر ڈے کے موقع پر گفتگو کرتے ہوئے کہی ۔

انہوں نے کہا کہ صوبہ پنجاب مضبوط ثقافت کا حامل ہے جس میں پنجابی ثقافت کے ساتھ بلوچی، سرائیکی، پوٹھوہاری ثقافت کے رنگ بھرے ہیں۔
فنون لطیفہ، بول چال، لباس، کھانے، طرز تعمیر تقافت کے مختلف رنگ ہیں ۔

حکومت پنجاب ثقافتی سرگرمیوں کے فروغ کے لیے کوشاں ہے۔

ملتان ریجن کی پولیس بھی پنجاب کلچر ڈے کو بھر پور طریقے سے منا رہی ہے، اور پولیس نہ صرف ثقافتی پروگراموں کو تحفظ فراہم کررہی ہے، بلکہ افسران اور اہلکار خود بھی دوران ڈیوٹی ثقافتی رنگوں کو اپنائے ہوئے ہیں ۔

ریجنل پولیس آفیسر جاوید اکبر ریاض نے کہا کہ میں خود بھی اور میرے دفتر کے افسران اور عملہ بھی پنجاب کی ثقافت کو اپناتے ہوئے پگڑی پہن کر سرائیکی اجرک کے ساتھ دفتری امور انجام دے رہے ہیں، اور آنے والے سائلین کے لیے یہ ایک خوشگوار تاثر ہے۔