نئے سکول کھولنے کا فیز ون کامیابی سے مکمل
پنجاب ایجوکیشن فاؤنڈیشن کے زیر انتظام منسوخ شدہ سکولوں کی جگہ نئے سکول کھولنے کا فیز ون کامیابی سے مکمل ہوگیا ہے۔
اس حوالے سے منیجنگ ڈائریکٹر پنجاب ایجوکیشن فاؤنڈیشن اسد نعیم کی زیر صدارت پیف ہیڈ آفس میں معاہدہ شراکت داری تقریب کا انعقاد کیا گیا۔
ایم ڈی پیف نے منسوخ شدہ سکولوں کی سائٹس پر میرٹ پر پورا اترنے والے 68سکول مالکان کو مبارکباد پیش کی۔
ایم ڈی پیف نے کہا کہ اس منصوبے کا مقصد منسوخ شدہ سائٹس پر موجود بچوں کا مستقبل محفوظ بنانا اور ان کے گھروں کے نزدیک تعلیمی سلسلہ کو جاری رکھنا ہے۔
انہوں نے مزید کہا کہ پیف انتظامیہ کا ہمیشہ سے فوکس رہا ہے کہ پارٹنر سکولوں کے ذریعے بے وسیلہ طالبعلموں کو مفت اور معیاری تعلیم فراہم کی جاسکے۔
معاہدہ شراکت پر دستخط کرنے والے سکول مالکان نے اس عزم کا اظہار کیا کہ وہ طالب علموں کو معیاری تعلیم فراہم کر کے تعلیم یافتہ پاکستان کے قیام میں اپنا بھرپور قردار ادا کریں گے۔