روٹری ایویول گروپ کے وفد کی سیکرٹری سکولز جنوبی پنجاب سے ملاقات
روٹری ایویول گروپ کے وفد روٹری انٹر نیشنل کے زونل کوآرڈینیٹر ساؤتھ پنجاب محمد سلیم ناصر کی قیادت میں محکمہ اسکول ایجوکیشن جنوبی پنجاب کے اسپیشل سیکرٹری ڈاکٹر عبید اللہ کھوکھر سے ملاقات کی، جس میں تعلیم کے فروغ، ٹرانس ایجوکیشن، اور تکنیکی تربیت کے شعبوں میں باہمی تعاون پر تفصیلی تبادلہ خیال کیا گیا۔
ملاقات کا مقصد سرکاری و نجی شعبوں کے درمیان مؤثر اشتراکِ عمل قائم کرنا تھا تاکہ جنوبی پنجاب کے طلبہ کو جدید اور معیاری تعلیم کے ساتھ ساتھ عملی و فنی مہارتیں بھی فراہم کی جا سکیں۔
روٹری ایویول گروپ نے اس بات پر زور دیا کہ وہ محکمہ تعلیم کے ساتھ مل کر ایسے منصوبے شروع کرنا چاہتے ہیں جن کے ذریعے طلبہ کو نہ صرف کلاس روم کی سطح پر تعلیم دی جائے بلکہ انہیں عملی زندگی کے لیے تیار کرنے کے لیے ٹیکنیکل ٹریننگ، ووکیشنل ایجوکیشن اور ہنر مندی کے شعبوں میں بھی مواقع فراہم کیے جائیں۔ گروپ نے اپنے ممکنہ منصوبہ جات کا خاکہ بھی پیش کیا اور ان کے نفاذ کے لیے محکمہ کی مکمل سرپرستی کی خواہش ظاہر کی۔
اس موقع پر محکمہ اسکول ایجوکیشن نے روٹری ایویول گروپ کے جذبے کو سراہا اور انہیں مکمل تعاون کی یقین دہانی کروائی۔
محکمہ کی جانب سے ایڈیشنل سیکرٹری ایجوکیشن خواجہ مظہر الحق اور ڈپٹی سیکرٹری حنا چوہدری کو فوکل پرسن نامزد کیا گیا ہے، جو روٹری گروپ کے ساتھ آئندہ روابط، میٹنگز اور منصوبہ بندی میں مسلسل رابطے میں رہیں گے۔
یہ قدم دونوں اداروں کے درمیان مؤثر ہم آہنگی اور تیز تر پیش رفت کے لیے اہم سمجھا جا رہا ہے۔ جبکہ اس وفد میں چوہدری جاوید اختر میو،عائشہ غازی بھی ہمراہ تھی۔
