سکولوں میں جاری تعمیراتی پراجیکٹس کے گرد حفاظتی حصار قائم کرنے کا حکم
محکمہ سکولز نے صوبے بھر کے سرکاری اسکولوں میں جاری اور مجوزہ تعمیراتی کاموں کے حوالے سے سخت حفاظتی ہدایات جاری کر دی ہیں۔
مراسلے میں تمام ڈسٹرکٹ ایجوکیشن اتھارٹیز کے چیف ایگزیکٹو افسران کو ہدایت کی گئی ہے کہ پنجاب کے تمام سرکاری اسکولوں میں جہاں تعمیراتی سرگرمیاں جاری ہیں یا شروع کی جانی ہیں، وہاں تعمیراتی مقامات کو مکمل طور پر حفاظتی گھیرے میں لیا جائے گا تاکہ طلبہ کی رسائی ممکن نہ ہو، ہر تعمیراتی سائٹ پر ایک ذمہ دار استاد کی ڈیوٹی لگانا لازمی ہے جو حفاظتی اقدامات کی نگرانی کرے گا۔
مزید برآں اس امر کو یقینی بنائے گا کہ کوئی بھی طالب علم تعمیراتی جگہ کے قریب نہ جا سکے اگر کوئی واقعہ رونما ہوگیا تو متعلقہ ضلع کے چیف ایگزیکٹو آفیسر، ڈسٹرکٹ ایجوکیشن اتھارٹی کو ذمہ دار ٹھہرایا جائے گا اور اس عمل کو مجرمانہ غفلت تصور کیا جائے گا۔
تمام ضلعی افسران ان ہدایات پر لفظاً اور روحاً عملدرآمد کو یقینی بنائیں۔
