سویپرز آر سُپر ہیروز

ملتان ویسٹ منیجمنٹ کمپنی کے سینٹری ورکرز نے اپنے وقار اور سماجی تحفظ کے لئے آگاہی مہم شروع کردی ہے، جس میں شہریوں سے صفائی کرنیوالوں سے منسوب اصطلاحات اور تصورات بدلنے کی اپیل کی گئی ہے۔

سینٹری ورکرز نے مختلف نعروں پر مبنی کتبے اٹھا کر آگاہی مہم کا آغاز کردیا ہے۔

ان کتبوں پر "عزت میرا حق ہے” ، "میں صفائی والا ہوں چوہڑا نہیں” ، "آپ کے عزت کے دو بول میرا حوصلہ بڑھاتے ہیں” اور "میں 21 ویں صدی میں بھی چوہڑا کیوں؟” جیسے نعرے درج تھے۔

ایم ڈی ملتان ویسٹ منیجمنٹ کمپنی فخرالاسلام ڈوگر نے اس مہم پر اپنے رد عمل کا اظہار کرتے ہوئے کہا ہے کہ سینٹری ورکرز نصف ایمان کے امین ہیں اور کمپنی انتظامیہ کو شہر کوصاف ستھرا اور خوبصورت رکھنے والے اپنے ورکرز پر فخر ہے۔

انہوں نے کہا کہ ایڈو کیسی مہم سینی ٹیشن سے وابستہ افراد کی حفاظت اور وقار کے لئے شروع کی گئی ہے۔ہمیں صفائی ورکرز بارے اپنے رویے بدلنے چاہیے اور انہیں نامناسب الفاظ سے پکارنے سے اجتناب کرنا چاہیے۔

فخرالاسلام ڈوگر نے کہا کہ عزت اور وقار دینے کے لئے ملتان ویسٹ منیجمنٹ کمپنی کی انتظامیہ ورکرز کے ساتھ کھڑی ہے۔