عدالت عالیہ نے توہین عدالت کیس میں زکریا یونیورسٹی کے وائس چانسلر اور رجسٹرار کو طلب کرلیا
بہاالدین زکریا یونیورسٹی ملتان کے طالب علم محمد نعمان علوی اور عبد الباری بلوچ نے وکیل سردار محمد رفیق ڈوگر ایڈووکیٹ ہائی کورٹ کے ذریعے ایک رٹ پٹیشن نمبری 13535/2020 دائر کی ، جس میں موقف اختیار کیا کہ کورونا وائرس کی بد ترین صورتحال میں یونیورسٹی کے روز مرہ معمول کے اخراجات جو کہ دوران لاک ڈاؤن نہیں ہو رہے تھے یونیورسٹی نے طالب علموں سے وہ بھی فیسز کے ساتھ وصول کیے ہیں۔
جس کی بابت عدالت عالیہ لاہور ہائی کورٹ ملتان بنچ ملتان نے وائس چانسلر بہاالدین زکریا یونیورسٹی اور رجسٹرار بہاالدین زکریا یونیورسٹی ملتان کو ڈائریکشن دی کہ وہ طالبعلموں سے ٹیوشن فیس کے علاوہ لیے گئے تمام چارجز جس میں میڈیکل فیس، ٹرانسپورٹ فیس،لائبریری فیس، اسپورٹس چارجز، اور ہوسٹل چارجز جو کہ یونیورسٹی نے بلاوجہ وصول کیے ہیں کے متعلق طلباء کی تحفظات کا فیصلہ کریں، اور یونیورسٹی کو یہ معاملہ 30 دنوں میں ختم کرنے کا حکم جاری کیا۔ جس پر یونیورسٹی نے کوئی عمل نہ کیا۔
جس پر وکیل سردار محمد رفیق ڈوگر ایڈووکیٹ ہائی کورٹ نے توہین عدالت crl org no 44/21 دائر کی، جس میں امروز مسڑجسٹس محمد رضا قریشی نے وائس چانسلر ڈاکٹر منصور اکبر کُنڈی اور رجسٹرار صہیب راشد خان کو6 اکتوبر کو اصالتا ریکارڈ سمیت عدالت میں طلب کر لیا۔