ویمن یونیورسٹی : نئی طالبات کے اعزاز میں استقبالیہ تقریب

ویمن یونیورسٹی کے نئے سیشن2025 کی طالبات کو خوش آمدید کہنے کےلئے تقریب کا اہتمام کیا گیا۔

ترجمان کےمطابق ویمن یونیورسٹی ملتان کے ڈائریکٹوریٹ آف سٹوڈنٹ افیئرز نے تعلیمی سال 2025 کے لیے نئی داخل ہونے والی طالبات کے استقبال کے لیےتقریب کا اہتمام کیا، تقریب کا مقصد نئے گریجویٹس کو تعلیمی ماحول، یونیورسٹی کی ثقافت اور یونیورسٹی میں پیش کیے جانے والے سکالرشپ اور سہولیات کے بارے میں آگاہی دینا تھا۔

تقریب کی مہمان خصوصی وائس چانسلر پروفیسر ڈاکٹر کلثوم پراچہ تھیں، انہوں نے طالبات سے خطاب کرتے ہوئے کہا کہ ویمن یونیورسٹی ملتان خواتین کو تعلیم یافتہ اور بااختیار بنانے کے مشن پر گامزن ہے تاکہ وہ معاشرے میں ایک قابل شہری بن کر پاکستان کی خدمت کرسکیں۔

یونیورسٹی طالبات کی کردار سازی، خود اعتمادی، اور تعلیمی منازل کو احسن طریقے سے حاصل کرنے کےلئے ہر طرح سے حوصلہ افزائی کرتی ہے، اس لئے تعلیم کو کامیابی اور قوم کی تعمیر کے لیے اپنا سب سے مضبوط ذریعہ بنائیں۔ طالبات لگن، دیانتداری اور تخلیقی صلاحیتوں کے ساتھ علم حاصل کریں، تعلیم بااختیار بنانے اور سماجی تبدیلی کی کلید ہےطالبات یونیورستی کی طرف سے فراہم کردہ مواقع سے زیادہ سے زیادہ فائدہ اٹھائیں اور اس کے نظم و ضبط، محنت اور عمدگی کی اقدار کو برقرار رکھیں۔

تقریب میں ڈاکٹر عدیلہ سعید، ڈائریکٹر اسٹوڈنٹ افیئرز کا ایک حوصلہ افزا خطاب بھی پیش کیا گیا، جنہوں نے گرمجوشی اور جوش کے ساتھ نئے بیچ کا خیرمقدم کیا۔ انہوں نے طلباء کو یونیورسٹی کے قوانین، طلباء کے معاونت کے نظام اور غیر نصابی مواقع کے بارے میں آگاہ کیا۔

ڈائریکٹر سٹوڈنٹس افیئر ڈاکٹر عدیلہ نے خطاب کرتے ہوئے کہا کہ ڈائریکٹوریٹ آف اسٹوڈنٹ افیئرز طالبات اور انتظامیہ کے درمیان ایک پل کا کام کرتا ہے، جو ان کی فلاح و بہبود اور مسائل کے حل کو یقینی بناتا ہے اس لئے طالبات یونیورسٹی کے بہترین ماہرین تعلیم سے سیکھنے کے ساتھ ہم نصابی اور کمیونٹی سرگرمیوں میں بڑھ چڑھ کر حصہ لیں۔

تقریب سے خطاب کرتے ہوئے ڈائریکٹر اسپورٹس ڈاکٹر رائمہ نذر نے کہا کہ ویمن یونیورسٹی ملتان نہ صرف تعلیم میں بلکہ کھیل، ثقافت اور قیادت کے مواقع فراہم کرنے میں بھی نمایاں کردار ادا کر رہی ہے۔

انہوں نے کہا کہ طالبات اپنی صلاحیتوں کو نکھارنے اور اعتماد کے ساتھ آگے بڑھنے کے لیے ہر ممکن مواقع سے فائدہ اٹھائیں۔انہوں نے مزید کہا کہ کھیل اور مثبت سرگرمیاں طالبات میں نظم و ضبط، ٹیم ورک اور خود اعتمادی پیدا کرتی ہیں، جو عملی زندگی میں کامیابی کی بنیاد بنتی ہیں انہوں نے طالبات کو آگاہی دی اور کیمپس میں فراہم کردہ سہولیات اور سکالرشپ کے بارے میں بتایا۔

تقریب میں تمام شعبوں کی چیئرپرسنز اور اساتذہ نے بھی شرکت کی۔