آلائشوں کی چربی پگھلا کر تیل نکالنے والےچار افراد گرفتار

ڈپٹی کمشنر ملتان علی شہزاد کی ہدایت پر جانوروں کی آلائشوں کی چربی پگھلا کر تیل نکالنے والوں کے خلاف کارروائی کے دوران اسسٹنٹ کمشنر سٹی خواجہ عمیر محمود نے پولیس کے ہمراہ شجاع آباد کینال روڈ پر چھاپہ مار کر چار افراد گرفتار کر لیا ہے، اور ان کے خلاف تھانہ صدر میں مقدمہ درج کر لیا گیا ہے۔
چھاپے کے وقت دو افراد موقع سے فرار ہو گئے ، جن کی تلاش جاری ہے۔
مقدمہ میونسپل سروسز اور ماحولیاتی آلودگی پھیلانے کے ایکٹ کے تحت درج کیا گیا۔
چھاپے کے وقت نہر کنارے بے دھڑک آلائشوں اور انتڑیوں سے چربی نکالی جارہی تھی۔آلائشوں کی بدبو نے پورے علاقے کو اپنی لپیٹ میں لے رکھا تھا۔
یاد رہے کہ آلائشوں کی چربی سے حاصل کئے جانے والے تیل کو کھانے پینے کی مختلف اشیاءبنانے کے لئے استعمال کیا جاتا ہے۔