جمشید دستی بھی زکریا یونیورسٹی کے احتجاجی ڈیلی ویجز ملازمین کے سنگ،عید کے بعد تحریک چلانے کا اعلان
زکریا یونیورسٹی کے ڈیلی ویجز ملازمین کے احتجاج کا سلسلہ جاری ہے، گزشتہ روز سابق رکن اسمبلی جمشید دستی ملازمین سے اظہار یکجہتی کرنے دھرنے میں پہنچ گئے۔
اس موقع پر ملازمین سے خطاب کرتے ہوئے ان کا کہنا تھا کہ انتظامیہ کو عید تک کی مہلت ہے عید کے بعد ملازمین کو حق نہ ملا تو تحریک چلائی جائے گی۔
جبکہ ذرائع کا کہنا ہے کہ اپوزیشن لیڈ ر سینیٹر سید یوسف رضاگیلانی نے بھی عید کے بعد ملازمین کے دھرنے میں آنے کی یقین دہانی کرائی ہے اورکہا کہ ملتان کے ملازمین کو حق دلاکررہیں گے۔
علاوہ ازیں ملازمین نے گزشتہ صبح بھی تمام دفتری امور کابائیکاٹ کیا اور کمروں کو تالے لگادئے، کریش ہال سارا دن احتجاجی نعروں سے گونجتا رہا ۔
اس موقع پرملازمین سے خطاب کرتے ہوئے صدر ملک صفدر حسین اور رانا مدثر کا کہنا تھا کہ ہمار ی جدوجہد 16روز میں داخل ہوگئی، جب تک حق نہیں ملے گا پڑتال جاری رہے گی، عید کے بعد احتجاج میں شدت لائی جائے گی اور ملازمین کے اہل خانہ بھی اس احتجاج میں شریک ہوںگے۔
جبکہ سینئر سیاستدانوں نے بھی ہماری حمایت کا اعلان کرتے ہوئے احتجاج میں شرکت کی یقین دہانی کرائی ہے اب انتظامیہ نے سوچنا ہے کہ وہ امن کے ساتھ حق دیتی ہے یا ملازمین کو پرتشدد احتجاج پر مجبور کرتی ہے ملازمین اب اپنا حق لیکر رہیں گے ۔
