ریاست کو کمزور نہ سمجھیں، ہم نے بڑے بڑے دہشت گرد گروپس کو شکست دی ہے: فواد چوہدری

وفاقی وزیر اطلاعات فواد چوہدری نے کالعدم تنظیم کی جانب سے پُر تشدد احتجاج اور راستے بند کرنے کے حوالے سے متنبہ کیا ہے کہ ریاست کو کمزور نہ سمجھیں، ہم نے بڑے بڑے دہشت گرد گروپس کو شکست دی ہے۔
وزیر اطلاعات فواد چوہدری نے جمعہ کو پریس کانفرنس میں کہا کہ قومی سلامتی کمیٹی کے اجلاس کا اعلامیہ جاری کر دیا گیا ہے، ٹی ایل پی کے احتجاج میں 5 پولیس اہل کار شہید اور درجنوں زخمی ہوئے ہیں۔
انھوں نے کہا رحمتہ للعالمینﷺ سے متعلق پوری امت مسلمہ متحد ہے، لیکن تحریک لبیک والے ایک جتھہ لے کر آگئے اور حکومت کا مذاق اڑایا جا رہا ہے۔
انھوں نے کہا پانچ چھ دن سے جی ٹی روڈ بلاک ہے، اور تاجر ریاست کی طرف دیکھ رہے ہیں، حکومت نے بہت صبر کا مظاہرہ کیا ہے، یہ جان لیں کہ ہم نے بڑے بڑے دہشت گرد گروپس کو شکست دی ہے۔
وزیر اطلاعات نے واضح کیا کہ ٹی ایل پی کے ساتھ مذاکرات آئین اور قانون کے مطابق ہوں گے، ملک میں بادشاہت نہیں جمہوریت ہے، حکومت سب سے مذاکرات کے لیے تیار ہے۔فواد چوہدری نے کہا ریاست کو کم زور نہ سمجھیں، اپنے گھروں کو جائیں، حکومت زیادہ دیر مذاق برداشت نہیں کر سکتی، مظاہرین کو ایک حد سے آگے جانے کی اجازت نہیں دی جا سکتی، احتجاج کے باعث صورت حال ایسی ہو گئی ہے کہ کلمہ گو کو اپنی گواہی دینا پڑ رہی ہے۔

انھوں نے کہا کہ ہم امن سے معاملات حل کرنا چاہتے ہیں تاہم اسے ریاست کی کمزوری نہ سمجھا جائے، ڈنڈوں کے زور پر مطالبات تسلیم نہیں کرائے جا سکتے، ریاست کی رٹ برقرار رکھنے کے لیے کسی بھی حد تک جانے کو تیار ہیں۔