ملتان میں بھی نیا پاکستان ہاوسنگ سکیم کا سنگ بنیاد رکھ دیا گیا
صوبہ پنجاب کے دوسرے شہروں کی طرح ضلع ملتان میں بھی نیا پاکستان ہاوسنگ سکیم کا سنگ بنیاد رکھ دیا گیا ہے۔
ملتان کی تحصیل جلالپور پیر والا میں104 گھر تعمیر کئے جائیں گے۔نیا پاکستان ہاوسنگ سکیم32 کنال14 مرلے رقبہ پر قائم کی جارہی ہے۔ہاوسنگ کالونی میں کشادہ سڑکیں، مسجد، سکول،کلینک،کمرشل مارکیٹ اور پارکس بھی تعمیر ہونگے۔
وزیر اعظم عمران خان نے ویڈیو لنک کے ذریعے گزشتہ روز منصوبے کا سنگ بنیاد رکھا۔سپورٹس کمپلیکس ملتان میں بھی بیک وقت تقریب کا اہتمام کیا گیا۔
تقریب میں پارلیمنٹیرین اور سرکاری افسران نے سنگ بنیاد کی تختی کی نقاب کشائی کی۔افتتاح کرنیوالوں میں احمد حسن ڈیہڑ ایم این اے، جاویداختر انصاری ایم پی اے،خالد جاوید وڑائچ، اکرم کنوں اور سرکاری افسران میں کمشنرجاویداختر محمود،آر پی او خرم علی شاہ،ڈپٹی کمشنرعلی شہزاد اور سی پی منیر مسعود مارتھ شامل تھے۔
ممبر قومی اسمبلی احمد حسن ڈیہڑ نے اس موقع پر گفتگو کرتے ہوئے کہا کہ وزیراعظم عمران نے خان نے 50 لاکھ گھر دینے کا وعدہ کیا تھا۔پی ٹی آئی کی حکومت وعدے کی تکمیل کی طرف بڑھ رہی ہے۔نیا پاکستان ہاوسنگ سکیم کے لئے ملک میں130 مقامات کا انتخاب کر لیا گیا ہے۔جون سے قبل 58مقامات پر گھر بنانے کے کام کا آغاز کردیا گیا ہے۔ 36 ہزار گھروں کی تعمیر شروع ہو چکی ہے۔
احمد حسن ڈیہڑ نے بتایا کہ 14 لاکھ روپے کی قیمت میں شہری اپنے گھر کے مالک بن سکیں گے۔ہر گھر پر 3لاکھ کی سبسڈی دی جارہی ہے۔مکان خریدنے والے کو10 لاکھ روپے کا قرض3 فیصد شرح منافع پر بنک ادا کرے گا۔گھر کی ماہانہ قسط 10 ہزار روپے ہو گی۔
یہ پہلا موقع ہے کہ گھر خریدنے پر سبسڈی دی جارہی ہے۔ہاوسنگ انڈسٹری کی سرگرمیوں سے پورے ملک کی معیشت کا پہیہ چلے گا۔احمد حسن ڈیہڑ نے کہا کہ اب کسانوں کو بھی سُکھ ملے گا اور ان کے دن بھی پھریں گے۔کسانوں کے لئے بہت سی خوشخبریاں پائپ لائن میں ہیں۔
