ملتان میں عارضی احساس بازار قائم
وزیراعلی پنجاب عثمان بزدار کے وژن کے تحت ضلعی انتظامیہ کی جانب سے غریب افراد کیلئے جنرل بس سٹینڈ پر عارضی احساس بازار قائم کردیا گیا ہے۔
عارضی احساس بازار میں شدید سردی کے پیش نظر غریب افراد کو جوتے اور ملبوسات فراہم کئے جائیں گے۔
ڈپٹی کمشنر عامر کریم خاں نے گزشتہ روز جنرل بس سٹینڈ پر احساس بازار کا افتتاح کیا۔
اس موقع پر ایڈیشنل ڈپٹی کمشنر ریونیو طیب خان، اسسٹنٹ کمشنر سٹی خواجہ عمیر محمود اور سیکرٹری آر ٹی اے رانا محسن بھی موجود تھے۔
ڈپٹی کمشنر عامر کریم خاں نے احساس بازار کے افتتاح کے بعد شہریوں میں ملبوسات اور جوتوں سمیت دیگر سامان تقسیم کیا۔
اس موقع پر میڈیا سے گفتگو کرتے ہوئے ڈپٹی کمشنر عامر کریم خاں کا کہنا تھا کہ وزیراعلی پنجاب کے وژن کے تحت عام آدمی کو ریلیف دینے کیلئے احساس بازار قائم کیا ہے۔شدید سردی کے پیش نظر غریب افراد کو جوتے اور ملبوسات فراہم کئے جائیں گے۔
ضلعی انتظامیہ نے ابتدائی طور پر نجی سیکٹر کے تعاون سے عارضی احساس بازار جنرل بس سٹینڈ پر قائم کیا ہے تاکہ زیادہ سے زیادہ شہریوں میں ملبوسات اور جوتے تقسیم کئے جاسکیں۔
ڈپٹی کمشنر نے کہا کہ احساس بازار سے مرد اور خواتین و بچے یکساں مستفید ہونگے اور سامان حاصل کرنے والوں کا مکمل ریکارڈ بھی رکھا جائے گا۔
قبل ازیں ڈپٹی کمشنر نے احساس بازار آنیوالے شہریوں میں ملبوسات اور جوتے بھی تقسیم کئے اور سٹالز کا معائنہ کیا۔
اس موقع پر سیکرٹری آر ٹی اے رانا محسن نے احساس بازار ہر بریفنگ بھی دی۔
