اساتذہ کے کوائف کی تصدیق میں رکاوٹ ڈالنے والے عملے کے خلاف کارروائی کاعندیہ

محکمہ سکولز ٹرانسفر ہونے والے اساتذہ کے کوائف کی تصدیق میں رکاوٹ ڈالنے والے عملے کے خلاف متحرک ہوگیا، سی ای اوز کو حتمی وارننگ جاری کردی ۔

اس سلسلے میں  ڈائریکٹر مانیٹرنگ رانا عبدالقوم کی طرف سے جاری ہونے والے مراسلے میں کہاگیا ہے کہ ای ٹرانسفر کے حوالے سے تصدیق کا عمل جاری ہے۔

یہ مشاہدے میں آیا ہے کہ کچھ اضلاع میں درخواست دہندگان کو دستاویزات کی تصدیق کے دوران پریشانی کا سامنا ہے۔ عملہ جان بوجھ کر ان کے کوائف کی تصدیق نہیں کررہا ہے اور مسترد کررہا ہے جو سراسر ناانصافی ہے اور غیر مناسب عمل ہے۔

تمام سی ای او اپنے عملے کو طریقہ کار آسان بنانے اور بلا جواز اعتراضات کرنے سے منع کریں، ناانصافی کے لیے متعلقہ سی ای او ذمہ دار ہو گا۔