کمبائن ہارویسٹر کے بعد بچنے والے گندم کی ناڑ کو آگ نہ لگائی جائے:ڈاکٹر زاہد محمود
کاشتکارگندم کی مشینی کٹائی (کمبائن ہارویسٹر)کے بعد بچنے والے ناڑ کو ہرگزآگ نہ لگائیں، اس سے زمین میں موجود فائدہ مند جرثوموں کا نقصان ہوتا ہے بلکہ اس کو کھیت میں ملا (دبا)کر نامیاتی مادے میں خاطر خواہ اضافہ ممکن ہے۔
یہ بات سنٹرل کاٹن ریسرچ انسٹیٹیوٹ،ملتان کے ڈائریکٹر ڈاکٹر زاہد محمود نے نے کہی ، ان کا مزید کہنا تھا کہ کاشتکار ناڑ دبانے کے لئے روٹا ویٹر کی بجائے ڈسک ہیرو استعمال کی جائے کیونکہ گندم کے ناڑ میں روٹا ویٹرمفیدنہیں ہے۔ ڈسک ہیرو لمبے رخ یا پھر چھوٹے رخ چلا کر پانی لگا دیں۔
یاد رہے مشین کی کٹائی کے بعد ناڑ کی چھوٹی چھوٹی ڈھیریوں کو سارے کھیت میں یکساں بکھیرا جائے۔ ڈسک ہیرو چلانے کے بعد کم از کم آدھی بوری یوریا فی ایکڑ چھٹا کر کے پانی لگا دیں اور وتر آنے پر الٹے رخ ڈسک ہیرو یا پھر روٹا ویٹر(اس وقت استعمال ہو سکتا ہے)چلا کر زمین تیار کر لیں۔ اسی وتر میں کھیلیاں بنا کر یا بذریعہ ڈرل کپاس کی کاشت جلد از جلد مکمل کریں۔گندم کا ناڑ کھیت میں دبانے سے نہ صرف نامیاتی مادہ بلکہ نائٹروجن، فاسفورس اور پوٹاش کے حصوں میں بھی اضافہ ہوتا ہے۔ مزید براں عناصر صغیرہ کی فراہمی میں خاطر خواہ اضافہ ہو جاتا ہے اور پودوں کی بڑھوتری اور بیماریوں کے خلاف قوت مدافعت آخر تک برقرار رہتی ہے جس سے منافع بخش پیداوار حاصل ہوتی ہے۔
