بے گھر بزرگ شہریوں کو چھت فراہم کرنے کا اصلاحی منصوبہ شروع
ضلعی انتظامیہ کی جانب سے بے گھر بزرگ شہریوں کو چھت فراہم کرنے کا اصلاحی منصوبہ شروع کردیا گیا ہے ۔
اس سلسلے میں ڈپٹی کمشنر عامر کریم خاں نے شمش آباد میں اولڈ ایج ہوم کی توسیعی عمارت کا سنگ بنیاد رکھا ، اس موقع پر سابق صدر چیمبر آف کامرس شیخ فضل الٰہی اور اسسٹنٹ کمشنر سٹی خواجہ عمیر محمود بھی موجود تھے۔
ڈائریکٹر سوشل ویلفئیر محمد مزمل یار نے منصوبے پر بریفنگ دی ،ڈپٹی کمشنر عامر کریم خاں نے کہا کہ پرانے اولڈ ایج ہوم میں اس وقت 20 سے زائد بزرگ شہری رہائش پذیر ہیں، جبکہ نئے اولڈ ایج ہوم میں 40 سے زائد برزگ شہریوں کو بلامعاوضہ رہائش فراہم کی جائے گی۔
ڈپٹی کمشنر نے کہا کہ عمارت کی اپ گریڈیشن میں چیمبر آف کامرس نے خصوصی تعاون کیا ہے ، جبکہ ڈی جی سوشل ویلفئیر پنجاب نے عمارت کی توسیع کیلئے نشاندھی کی تھی جس پر ضلعی انتظامیہ نے اس عمارت کو چیمبر آف کامرس کے تعاون سے مکمل کرنے کا ٹاسک شروع کیا ہے۔
ڈپٹی کمشنر عامر کریم خاں نے کہا کہ 27 رمضان المبارک کو اولڈ ایج ہوم کو مکمل فعال کردیا جائے گا۔
بے گھر شہریوں کا تحفظ ریاست کی اولین ذمہ داری ہے۔
ڈپٹی کمشنر نے بتایا کہ اولڈ ایج ہوم میں مثالی سہولیات کی فراہمی یقینی بنائی جائے گی۔
