ایمرسن یونیورسٹی میں سپورٹس اینڈ کلچر فیسٹول کی اختتامی تقریب
کمشنر ملتان ڈویژن انجینئر عامر خٹک نے کہا ہے کہ غیر نصابی سرگرمیوں سے طلباءکی تخلیقی صلاحیتوں کو نکھارنے میں مدد ملتی ہے، تعلیمی اداروں میں کلچرل شوز اور فیسٹول کے ذریعے اپنے وطن کا کلچر نئی نسل کے سینے میں منتقل کیا جاسکتا ہے ،جس سے صحت مند سوچ رکھنے والا معاشرہ پروان چڑھتا ہے۔
ان خیالات کا اظہار انہوں نے گزشتہ روز گورنمنٹ ایمرسن یونیورسٹی میں سپورٹس اینڈ کلچر فیسٹول کی اختتامی تقریب سے بطور مہمان خصوصی خطاب کرتے ہوئے کیا۔
وائس چانسلر ایمرسن یونیورسٹی پروفیسر ڈاکٹر محمد رمضان بھی اس موقع پر موجود تھے ۔
کمشنر انجینئر عامر خٹک نے کہا کہ آج وطن عزیز جن حالات سے گزر رہا ہے نئی نسل کی صلاحیتوں کو بروئے کار لانے کی ضرورت ہے، اس سلسلے میں تعلیمی نظام بہتر کرکے جدید خطوط پر انکی ذہنی آبیاری کرنا ناگزیر ہے۔
کمشنر نے کہا کہ سپورٹس و کلچر فیسٹول میں طلباء کی رنگارنگ پرفارمنس دیکھ کر دلی خوشی ہوئی ہے امید ہے کہ انکے ٹیلنٹ کو مزید پروان چڑھایا جائے گا۔
اس موقع پر وائس چانسلر ڈاکٹر محمد رمضان نے کہا کہ خوبصورت پاکستان کے نام سے ایمرسن یونیورسٹی سے ایک مہم کا آغاز کیا جارہا ہے، جس میں اپنے وطن کے مثبت پہلوؤں کو دنیا کے سامنے لایا جائے گا، کلچر فیسٹول بھی اس سلسلے کی ایک کڑی ہے۔
کمشنر ملتان ڈویژن انجینئر عامر خٹک نے اس موقع پر پوزیشن ہولڈرز طلباءو طالبات میں انعامات بھی تقسیم کئے۔
