آئی ایس پی اور این سی بی اے کو سیل کردیا گیا

محکمہ ایکسائز ٹیکسیشن اینڈ نارکوٹکس کنٹرول کے شعبہ پراپرٹی ٹیکس زون تھری نے ٹیکس نادہندگان کے خلاف کارروائیوں کو مزید تیز کردیا ہے۔
ذرائع کے مطابق ڈائریکٹر ایکسائز اینڈ ٹیکسیشن ملتان عبداللہ خان جلبانی کی ہدایت پر ای ٹی او عبدالمجید قریشی کی نگرانی میں انسپکٹر محمد سلیم میتلا اور اسلم لاشاری و ٹیم کے دیگر سٹاف نے لاکھوں روپے پراپرٹی ٹیکس کی نادہندہ انسٹی ٹیوٹ آف سدرن پنجاب اور این سی بی اے کالج کو حتمی نوٹس کے اجراء کے باوجود ٹیکس کی عدم ادائیگی پر سیل کردیا ہے۔
ذرائع نے بتایا کہ انسٹی ٹیوٹ آف سدرن پنجاب کے ذمہ پراپرٹی ٹیکس کی مد میں 50 لاکھ روپے سے زائد واجب الاداء ہیں ، جبکہ این سی بی اے کے ذمہ 4 لاکھ 25 ہزار روپے واجب الاداء ہیں۔
محکمہ کی جانب سے انتظامیہ کو متعدد نوٹس جاری کیئے گئے ہیں، لیکن ان کی جانب سے ٹیکس ادائیگی میں لیت و لعل کرنے پر گذشتہ روز ڈائریکٹر ایکسائز کی ہدایت پر ایکسائز کی ٹیم نے مذکورہ اداروں کو سیل کردیا ہے۔