ایچ ای سی پی ایچ ڈی اور انڈر گریجویٹ پالیسی مؤخر کرنے پر رضا مند

ہائرایجوکیشن کمیشن انڈر گریجویٹ اور پی ایچ ڈی پالیسی ایک سال تک موخر کرنے پر رضامند ہوگیا۔
تفصیل کے مطابق وائس چانسلر زکانفرنس میں ایچ ای سی اس با ت پر رضا مند ہوگیا کہ انڈر گریجویٹ اور پی ایچ ڈی پالیسی کو ایک سال تک مؤخر کردیا جائے، کانفرنس کے دوران وائس چانسلرز نے تمام شعبہ جات کے طلباء کو پہلے دو سمسٹرز میں یکساں نصاب پڑھانے اور بی ایس آنرز کے بعد ڈائریکٹ پی ایچ ڈی میں داخلوں کی پالیسی مسترد کر دی ہے۔
وائس چانسلرز نے مطالبہ کیا کہ پی ایچ ڈی میں داخلوں کیلئے ایم فل کی شرط کو برقرار رکھا جائے، وائس چانسلرز نے طلباء کو کسی بھی مضمون میں پی ایچ ڈی کرنے کی اجازت دینے کی پالیسی بھی مسترد کر دی ہے۔
جس کے بعد ہائر ایجوکیشن کمیشن نےمنظور شدہ دونوں پالیسیز کو کمیشن کے اجلاس میں نظر ثانی کیلئے پیش کرنے کا اعادہ کیا جس پر دونوں پالیسیز پر از سر نو جائزہ لینے کیلئے وائس چانسلرز کمیٹی بنانے پر اتفاق کیا گیا ہے۔
کانفرنس کے دوران بی ایس آنرز میں سنٹرلائزڈ داخلوں کی ایچ ای سی پالیسی پر وائس چانسلرز نے تحفظات کا اظہار کیا۔ وائس چانسلرز نے موقف اختیار کیا کہ بی ایس آنرز کے لیے سنٹرلائزڈ داخلہ پالیسی سے یونیورسٹیوں کے تدریسی شعبہ جات کمزور ہوں گے۔
وائس چانسلرز کانفرنس میں ملک بھر سے ایچ ای سی افسروں وائس چانسلرز اور ریکٹرز سمیت 206 افراد نے شرکت کی۔