ملتان: پاکستان انگلینڈ سیریز؛ ضلعی انتظامیہ اور پی سی بی کا مشترکہ اجلاس، انتظامات شروع کرنے کے احکامات جاری
شہر اولیاء کے شائقین کرکٹ پاکستان اور انگلینڈ ٹیسٹ سیریز کی میزبانی کیلئے تیار ہیں، کراچی ٹیسٹ ملتان منتقل ہونے سے ملتان، 7 سے 20 اکتوبر تک 2 ٹیسٹ میچوں کی میزبانی کرے گا۔
اس سلسلے میں ڈپٹی کمشنر وسیم حامد سندھو کی صدارت میں ضلعی انتظامیہ اور کرکٹ بورڈ کا مشترکہ اجلاس ہوا، جس میں ڈپٹی کمشنر نے ٹیسٹ سیریز کیلئے بھرپور سکیورٹی انتظامات کرنے کی یقین دہانی کروائی، پاک انگلینڈ ٹیسٹ ٹیموں کے مجوزہ قیام و سکیورٹی پلان کو حتمی شکل دے دی گئی ہے اور بتایا گیا کہ رومینزہ ھوٹل ڈی ایچ اے سے ملتان کرکٹ اسٹیڈیم کا روٹ براستہ متی تل۔ ناردن بائی پاس۔ وہاڑی روڈ سے ملتان کرکٹ اسٹیڈیم ھوگا۔
انگلینڈ کرکٹ بورڈ کی سیکورٹی ٹیم 26 ستمبر کو ملتان پہنچ کر سیکورٹی آڈٹ کرے گی، کرکٹ اسٹیڈیم اور روٹس پر خصوصی صفائی و انتظامات کئے جائیں گے، ضلعی محکمے کرکٹ میلے کو کامیاب بنانے کیلئے فوری اقدامات کریں۔
اجلاس میں ایڈیشنل ڈپٹی کمشنر جنرل محمد سیف اور ایڈیشنل ڈپٹی کمشنر فنانس مبشرالرحمن نے بھی شرکت کی۔
