مغربی ممالک کے سیاستدان کورونا وائرس کی تحقیق میں رکاوٹ بن گئے
جنوبی افریقا کے وبائی امراض کے ایک نامور ماہر نے کہا ہے کہ مغربی ممالک کے سیاست دان کرونا وائرس کے ماخذ کی تلاش کی کوششوں میں دخل اندازی نہ کریں۔
چینی میڈیا کے مطابق وبائی امراض کے نامور ماہر پروفیسر سلیم عبدالکریم نے مغربی ممالک کے سیاست دانوں پر زور دیا ہے کہ وہ کووِڈ 19 وائرس کے ماخذ کی تلاش میں دخل اندازی نہ کریں، تاکہ سائنس دان بنا کسی رکاوٹ کے وائرس کے ماخذ کی تلاش کر سکیں۔
انھوں نے کہا کہ عالمی ادارہ صحت مختلف ممالک کے سائنس دانوں کے ساتھ مل کر وائرس کے ماخذ کے بارے میں مشترکہ تحقیق کے لیے کوشاں ہے، جب کہ چین وائرس کے ماخذ کی تلاش میں عالمی ادارہ صحت کے ساتھ تعاون کرنے والا پہلا ملک ہے، چین نے عالمی ادارہ صحت سے یہ اپیل بھی کی ہے کہ دنیا کے مختلف ممالک میں اس سوال کا جواب تلاش کیا جائے۔
خیال رہے کہ تاحال متعدد تحقیقی نتائج ثابت کرتے ہیں کہ چین کے شہر ووہان میں وبا کے پھیلاؤ سے قبل ہی دنیا کے متعدد خطوں بشمول یورپ اور امریکا میں ملتی جلتی علامات دیکھی گئی ہیں۔
جنوبی افریقا کے وبائی امراض کے ماہر سلیم کریم نے کہا کہ وائرس کسی ایک ملک تک محدود نہیں ہے، ہمیں الزام تراشی کی بجائے سائنس کی بنیاد پر اس معاملے کی تفتیش کرنی چاہیئے، وبا بدستور پھیل رہی ہے، امید ہے کہ کچھ سیاست دان بالخصوص امریکی سیاست دان عالمی ادارہ صحت کے کام میں مداخلت نہیں کریں گے۔
