زکریا یونیورسٹی کے ایکٹ میں ترمیم کا گزٹ نوٹیفکیشن جاری کر دیا گیا
زکریا یونیورسٹی ملتان نے اہم سنگ میل عبور کرلیا وائس چانسلر بی زیڈ یو پروفیسر ڈاکٹر محمد زبیر اقبال کی انتھک کوششیں رنگ لے آئیں اور یونیورسٹی ایکٹ میں ترمیم کا گزٹ نوٹیفکیشن جاری ہونے کے بعد بی زیڈ یو کی الحاقی حدود کو پورے صوبۂ پنجاب تک وسعت دے دی گئی ہے۔
اس اہم پیش رفت سے یونیورسٹی کی ترقی اور اعلیٰ تعلیم کے فروغ کے نئے دروازے کھلیں گے۔اس موقع پر چیئرمین الحاق کمیٹی، پروفیسر ڈاکٹر محمد ریاض نے کہا کہ وائس چانسلر ڈاکٹر محمد زبیر اقبال نے یونیورسٹی کی بہتری کے لیے بے پناہ محنت اور توانائیاں صرف کی ہیں، جس کے ثمرات آج سب کے سامنے ہیں، یہ کامیابی یونیورسٹی کے وقار میں اضافہ کرنے کے ساتھ ساتھ مستقبل میں ادارے کی ترقی کے لیے مثبت اور وسیع تر اثرات مرتب کرے گی۔
ڈاکٹر محمد ریاض نے رجسٹرار مسٹر اعجاز احمد اور ڈپٹی رجسٹرار مسٹر محی الدین کی کوششوں کو بھی سراہا اور کہا کہ ان کی معاونت اور محنت بھی اس کامیابی میں نمایاں حیثیت رکھتی ہے۔
ماہرین کا کہنا ہے کہ الحاق کی حدود میں توسیع سے یونیورسٹی کو نئی سمت اور بہتر تعلیمی امکانات حاصل ہوں گے، جب کہ پنجاب بھر کے تعلیمی اداروں کو بی زیڈ یو کے ساتھ منسلک ہونے کا مؤثر اور وسیع موقع فراہم ہوگا۔
