پنجاب بھر کے سرکاری اور نجی سکولوں میں سکیورٹی انتظامات مزید سخت کرنے کا فیصلہ
محکمہ اسکول ایجوکیشن نے ہوم ڈیپارٹمنٹ کی جانب سے جاری کردہ سکیورٹی ایس او پیز پر فوری اور مکمل عملدرآمد کا حکم دے دیا ہے۔
مراسلے کے مطابق تمام سرکاری و پرائیویٹ اسکولوں میں داخلی اور خارجی راستوں پر سکیورٹی چیکنگ کو لازمی قرار دے دیا گیا ہے، جبکہ اسکولوں میں نصب سی سی ٹی وی کیمروں کی فعالیت یقینی بنانے کی بھی ہدایت کی گئی ہے۔
سکیورٹی ہدایات میں کہا گیا ہے کہ اسکولوں کے اطراف اور اندر مشکوک افراد پر کڑی نظر رکھی جائے اور کسی بھی مشتبہ سرگرمی کی فوری طور پر متعلقہ اداروں کو اطلاع دی جائے۔
اس حوالے سے اسکول انتظامیہ کو باقاعدہ سکیورٹی پلان پر عملدرآمد کی مکمل ذمہ داری سونپ دی گئی ہےمحکمہ اسکول ایجوکیشن نے واضح کیا ہے کہ سکیورٹی کے معاملے میں کسی قسم کی غفلت برداشت نہیں کی جائے گی اور ہوم ڈیپارٹمنٹ کی ہدایات پر مکمل عملدرآمد ہر صورت یقینی بنایا جائے گا۔
اس کے ساتھ ساتھ پنجاب کے تمام تعلیمی اداروں کو الرٹ رہنے اور سکیورٹی صورتحال پر مسلسل نظر رکھنے کی بھی ہدایت جاری کی گئی ہے۔
