تیسری چیف آف آرمی سٹاف انٹر کلب نیشنل ہاکی چیمپئن شپ ملتان ریجن لیول ٹو کا دوسرا روز
تیسرے چیف آف آرمی سٹاف انٹر کلب نیشنل ہاکی چیمپئن شپ ملتان ریجن لیول ٹو کے دوسرے روز ضلع وہاڑی کی چیمپئن ہاکی کلب آف وہاڑی نے المجیدیہ کلب کوہی والا خانیوال کو ایک کے مقابلے میں تین گول سے شکست دے دی۔
متی تل آسٹروٹرف ہاکی سٹیڈیم پر کھیلے گئے میچ میں وہاڑی کی طرف سے عبداللہ نے دو اور حسن علی نے ایک گول کیا۔ کوہی والا خانیوال کی طرف سے اکلوتا گول حماد نے کیا۔
میچ میں امپائرنگ کے فرائض کامران شریف چوہدری اور غفران نے انجام دیئے۔ میچ کے مہمانان خصوصی رانا اقرار اور عبدالسعید تھے۔
دریں اثناء المجیدیہ ہاکی کلب کوہی والا اپنے دونوں لیگ میچز میں شکست کے باعث ایونٹ سے باہر ہو گئی ہے ۔ ایونٹ میں اپنا ایک ایک لیگ میچ جیتنے والی ملتان ڈسٹرکٹ کی چیمپئن ینگ ہیروز ملتان اور وہاڑی ڈسٹرکٹ کی فاتح ہاکی کلب آف وہاڑی کے درمیان آج چیمپئن شپ کے آخری روز کھیلا جانیوالا آخری لیگ میچ بالواسطہ طور پر فائنل کی صورت اختیار کر گیا ہے، کامیابی پانے والی ٹیم ایونٹ کے تیسرے مرحلے کے لیے کوالیفائی کر جائے گی۔
کمشنر ملتان عامر کریم خان آج اختتامی روز کے مہمان خصوصی ہوں گے اور انعامات تقسیم کریں گے۔
