زرعی یونیورسٹی کے وائس چانسلر کی بڑی تقریب میں شرکت
محمد نواز شریف زرعی یونیورسٹی کے وائس چانسلر، پروفیسر ڈاکٹر آصف علی نے کونسل ہال، علامہ اقبال اوپن یونیورسٹی اسلام آباد میں منعقدہ یونیسکو اسٹریٹجک کوآپریشن روڈ میپ (2026–2030) سے متعلق اجلاس میں شرکت کی۔
اجلاس میں یونیسکو پاکستان کے نمائندگان اور مختلف قومی اداروں کے ذمہ داران نے شرکت کی۔
اجلاس میں یونیسکو کے عالمی ماہرین کے ساتھ مل کر روڈ میپ کو مزید مضبوط بنانے پر اتفاق کیا گیا، جس کا مقصد پالیسی سطح کے وعدوں کو قابلِ پیمائش عملی اقدامات میں تبدیل کرنا ہے۔
یہ روڈ میپ یونیسکو کی عالمی مہارت کو پاکستان کی قومی ترجیحات سے ہم آہنگ کرنے کے لیے تشکیل دیا گیا ہے، جن میں فائیو ایز فریم ورک اور پاکستان وژن 2025 شامل ہیں۔
یونیسکو کے کنٹری نمائندہ ڈاکٹر فواد پاشایف نے شراکت داری کی اہمیت پر زور دیتے ہوئے کہا کہ یہ اقدام نہ صرف یونیسکو کے نظام کے اندر ہم آہنگی کو مضبوط بنائے گا بلکہ اس کے نیٹ ورکس اور تمام شراکت داروں کے ساتھ تعاون کو بھی فروغ دے گا تاکہ 2030 کے بعد کے عالمی ایجنڈے کی تشکیل میں فعال کردار ادا کیا جا سکے۔
پروفیسر ڈاکٹر آصف علی نے اجلاس میں شرکت کو پاکستان میں تعلیم، تحقیق اور پائیدار ترقی کے اہداف کے فروغ کی جانب ایک اہم قدم قرار دیا اور ادارہ جاتی تعاون کو مزید وسعت دینے کے عزم کا اعادہ کیا۔
