سکولوں میں سالانہ امتحانات کا آغاز ہوگیا، ملتان سمیت صوبہ بھر سے تقریباً 80 لاکھ طلباء امتحان میں شریک
محکمہ سکول ایجوکیشن کے زیر اہتمام سرکاری سکولوں میں سالانہ امتحانات کا باقاعدہ آغاز ہو گیا ہے۔
اس سلسلے میں محکمہ کی جانب سے ترمیم شدہ ڈیٹ شیٹ بھی جاری کر دی گئی ہے جس کے مطابق بیشتر جماعتوں کے امتحانات عیدالفطر سے قبل مکمل کر لیے جائیں گے۔
امتحانات کے پہلے روز ضلع بھر کے سرکاری سکولوں میں طلبہ کی بڑی تعداد نے پرجوش انداز میں شرکت کی جبکہ سکولوں میں امتحانی عمل کو شفاف اور منظم بنانے کے لیے خصوصی انتظامات کیے گئے۔
محکمہ سکول ایجوکیشن کے مطابق سالانہ امتحانات کا آغاز 9 مارچ سے ہو چکا ہے اور تمام سکولوں کو جاری کردہ شیڈول کے مطابق امتحانات کے انعقاد کی ہدایات دی گئی ہیں۔
امتحانی مراکز میں طلبہ کے لیے نشستوں کا مناسب انتظام، سوالیہ پرچوں کی بروقت فراہمی اور نظم و ضبط برقرار رکھنے کے لیے اساتذہ کی ڈیوٹیاں بھی لگائی گئی ہیں۔ امتحانات کے دوران نقل کی روک تھام اور شفافیت کو یقینی بنانے کے لیے متعلقہ افسران کو مانیٹرنگ کی ذمہ داریاں بھی سونپی گئی ہیں۔
جاری کردہ ترمیم شدہ ڈیٹ شیٹ کے مطابق پانچویں جماعت تک کے تمام امتحانات عیدالفطر سے قبل مکمل کر لیے جائیں گے۔
تفصیلات کے مطابق پانچویں جماعت کا آخری پرچہ 18 مارچ کو ہوگا جس میں حساب اور ناظرہ قرآن کے مضامین شامل ہیں، جبکہ پہلی اور دوسری جماعت کا آخری پرچہ 17 مارچ کو اردو کا لیا جائے گا۔
دیگر جماعتوں کے امتحانات بھی اسی شیڈول کے مطابق مرحلہ وار مکمل کیے جائیں گے۔
محکمہ تعلیم کے مطابق مڈل جماعتوں یعنی چھٹی تا آٹھویں کے بیشتر پرچے عید سے قبل مکمل ہو جائیں گے تاہم ان جماعتوں کے آخری دو پرچے عید کے بعد لیے جائیں گے۔ ان امتحانات میں 24 اور 25 مارچ کو ترجمۃ القرآن، اردو اور انگلش ریڈنگ کے پرچے شامل ہوں گے۔
امتحانات کے پہلے روز طلبہ مقررہ وقت سے پہلے ہی سکول پہنچ گئے اور پرجوش انداز میں امتحانی عمل میں حصہ لیا۔ اساتذہ کی جانب سے طلبہ کی رہنمائی اور نظم و ضبط برقرار رکھنے کے لیے خصوصی اقدامات کیے گئے جبکہ سکول انتظامیہ نے امتحانی ماحول کو پرسکون اور سازگار بنانے کے لیے انتظامات مکمل کر رکھے تھے۔
محکمہ سکول ایجوکیشن کے حکام کا اس حوالے سے کہنا ہے کہ امتحانی شیڈول میں تبدیلی طلبہ کی سہولت کو مدنظر رکھتے ہوئے کی گئی ہے تاکہ زیادہ تر امتحانات عیدالفطر سے پہلے مکمل کیے جا سکیں۔
حکام کے مطابق تمام سکولوں کو ہدایت کی گئی ہے کہ امتحانات کے انعقاد میں شفافیت کو یقینی بنایا جائے اور طلبہ کو بہترین تعلیمی ماحول فراہم کیا جائے، جبکہ افسران باقاعدگی سے سکولوں کے دورے کر کے امتحانی عمل کی نگرانی بھی کریں گے۔
