سیکرٹری زراعت پنجاب افتخار علی سہو کا دورہ ملتان
محمد نواز شریف زرعی یونیورسٹی میں سیکرٹری زراعت پنجاب افتخار علی سہو نے دورہ کیا اور کپاس کی اگیتی کاشت مہم کے حوالے سے اہم بریفنگ لی۔ انہوں نے کہا کہ موجودہ سال پنجاب بھر میں 32 لاکھ ایکڑ رقبے پر کپاس کاشت کرنے کا ہدف مقرر کیا گیا ہے، جس میں سے 7 لاکھ ایکڑ رقبے پر اگیتی کپاس کاشت کرنے کا ٹارگٹ رکھا گیا ہے۔
انہوں نے مزید کہا کہ زرعی یونیورسٹی ملتان کپاس کی اگیتی کاشت مہم کی پنجاب بھر میں نمائندگی کرے گی اور کسانوں کو نئی ورائٹیز اور جدید بیج فراہم کیے جائیں گے تاکہ موسمی حالات سے مقابلہ کیا جا سکے اور ماضی کی طرح کپاس کی پیداوار کی بحالی ممکن ہو سکے۔
اس موقع پر وائس چانسلر پروفیسر ڈاکٹر آصف علی نے بتایا کہ یونیورسٹی ریجنل ایگریکلچر کے پلیٹ فارم سے مختلف پرائیویٹ اور سرکاری اداروں کی بہترین کارکردگی کا مظاہرہ کرنے والی کپاس کی لائنز کی ڈسپلے کا اہتمام کر رہی ہے۔
ان کا کہنا تھا کہ زیادہ پاپولیشن والی لائن (زیادہ پیداوار دینے والی نسل) جو چین کے تعاون سے تیار کی گئی ہے، اس کی ابتدائی جانچ مکمل کر لی گئی ہے، اب اسے بڑے پیمانے پر جانچنے کا مرحلہ ہے۔
وائس چانسلر نے مزید بتایا کہ یونیورسٹی جدید تقاضوں سے ہم آہنگ ہوتے ہوئے دنیا کے اس طریقہ کار کو اپنانے کی طرف گامزن ہے، جہاں مشینری کے ذریعے مکینیکل پکنگ سے کپاس حاصل کی جا رہی ہے۔ اس حوالے سے بھی یونیورسٹی فعال اقدامات کر رہی ہے۔
