پیماء سکولوں کے ہزاروں اساتذہ تین ماہ سے تنخواہوں سے محروم
پنجاب ایجوکیشن فاؤنڈیشن کے پروگرام پیماء اسکولز سے وابستہ ہزاروں اساتذہ گزشتہ تین ماہ سے تنخواہوں سے محروم ہیں جس کے باعث تعلیمی اداروں میں شدید بے چینی پائی جا رہی ہے اور بڑی تعداد میں اساتذہ کے ملازمت چھوڑنے کا خدشہ پیدا ہو گیا ہے۔
ذرائع کے مطابق پیماء پروگرام کے تحت چلنے والے تقریباً 4,300 لائسنس یافتہ اسکولوں کو جنوری، فروری اور مارچ کی ادائیگیاں تاحال نہیں کی جا سکیں، جس کے نتیجے میں سکول مالکان اور اساتذہ دونوں شدید مالی بحران کا شکار ہیں، تاخیر کے باعث لگ بھگ 20 ہزار اساتذہ اور اسکول انتظامیہ کو شدید مالی مشکلات کا سامنا ہے۔
تعلیمی حلقوں کے مطابق پیماء اسکولوں میں تقریباً 6 لاکھ طلبہ زیر تعلیم ہیں اور اگر اساتذہ کی تنخواہوں کا مسئلہ جلد حل نہ ہوا تو اس کا براہ راست اثر بچوں کی تعلیم پر بھی پڑ سکتا ہے۔ متعدد اسکولوں میں اساتذہ کی کمی کا خدشہ ظاہر کیا جا رہا ہے کیونکہ کئی اساتذہ مالی مشکلات کے باعث متبادل روزگار تلاش کرنے پر مجبور ہو رہے ہیں۔
متاثرہ اساتذہ کا کہنا ہے کہ انہیں ہر ہفتے ادائیگیوں کے حوالے سے یقین دہانیاں کروائی جاتی ہیں، مگر عملی طور پر ادائیگیاں نہیں ہو رہیں۔ مسلسل تاخیر کے باعث ان کے گھریلو اخراجات اور روزمرہ زندگی شدید متاثر ہو رہی ہے۔
اساتذہ نے خبردار کیا ہے کہ اگر عید سے قبل تین ماہ کی بقایا تنخواہیں ادا نہ کی گئیں تو وہ احتجاجی مظاہرے کرنے پر مجبور ہوں گے۔
