فیڈرل بورڈ کا بیرونِ ملک امتحانات سے متعلق اہم اعلامیہ

فیڈرل بورڈ آف انٹرمیڈیٹ اینڈ سیکنڈری ایجوکیشن نے بیرونِ ملک منعقد ہونے والے امتحانات سے متعلق اہم اعلامیہ جاری کرتے ہوئے موجودہ سیکیورٹی صورتحال کے پیش نظر بڑے فیصلے کا عندیہ دے دیا ہے۔

اعلامیے کے مطابق خطے میں جاری جنگی صورتحال اور غیر یقینی حالات کے باعث ایس ایس سی 2026 کے امتحانات، جو 31 مارچ سے شروع ہونا تھے، متاثر ہو سکتے ہیں۔

حکام کا کہنا ہے کہ اگر سیکیورٹی خدشات برقرار رہے تو بیرونِ ملک امتحانات کو مؤخر کیا جا سکتا ہے، امتحانات کو عیدالفطر کے بعد دوبارہ شیڈول کیے جانے کا بھی قوی امکان ہے، جس کے لیے مختلف آپشنز پر غور جاری ہے۔

فیڈرل بورڈ حکام کا کہنا ہے کہ طلبہ اور والدین کے تحفظات کو مدنظر رکھتے ہوئے متبادل امتحانی انتظامات پر مشاورت جاری ہے، جبکہ کسی بھی حکومتی پابندی یا لاجسٹک مسائل کی صورت میں نیا لائحہ عمل ترتیب دیا جائے گا۔