یومِ پاکستان پر قومی یک جہتی اور ترقی کے عزم کی تجدید کی ضرورت ہے : خرم عظیم
جامعہ زکریا ایمپلائز ایسوسی ایشن کے سینئر رہنما خرم عظیم نے کہا ہے کہ یومِ پاکستان پر قومی یک جہتی اور ترقی کے عزم کی تجدید کی ضرورت ہے 23 مارچ یومِ پاکستان ہماری قومی تاریخ کا ایک اہم اور یادگار دن ہے، جب ہمارے اسلاف نے بے مثال قربانیوں اور ثابت قدمی کے ساتھ ایک آزاد وطن کے قیام کی بنیاد رکھی۔
انہوں نے کہا کہ یہ دن ہمیں وطنِ عزیز کی سالمیت، اتحاد اور ترقی کے لیے اپنے عزم کی تجدید کا موقع فراہم کرتا ہے۔
یومِ پاکستان دراصل قراردادِ لاہور کی یاد دلاتا ہے، جس نے برصغیر کے مسلمانوں کے لیے ایک علیحدہ ریاست کے قیام کی راہ ہموار کی۔
خرم عظیم نے کہا کہ ہمیں محمد علی جناح کے سنہری اصولوں—اتحاد، ایمان اور تنظیم—پر کار بند رہتے ہوئے نظریۂ پاکستان کی پاسداری کرنی چاہیے۔
انہوں نے زور دیا کہ قومی یکجہتی، بھائی چارے اور باہمی احترام کے فروغ کے بغیر ترقی کا خواب شرمندۂ تعبیر نہیں ہو سکتا ہر شہری کو چاہیے کہ وہ اپنے فرائض دیانتداری، محنت اور لگن کے ساتھ انجام دے اور ملک کی تعمیر و ترقی میں مثبت کردار ادا کرے، ان کا مزید کہنا تھا کہ اجتماعی کوششوں کے ذریعے ہی پاکستان کو ایک مضبوط اور خوشحال ریاست بنایا جا سکتا ہے۔
