تعلیمی اداروں کی سکیورٹی مزید سخت کرنے کا فیصلہ

پنجاب میں تعلیمی اداروں کی سکیورٹی مزید سخت کرنے کا فیصلہ کر لیا گیا ہے، جس کے تحت اساتذہ کو جدید سیفٹی سسٹم سے منسلک کیا جا رہا ہے۔

بتایا گیا ہے کہ اساتذہ کو سیف سٹی سسٹم سے جوڑنے کا عمل تیزی سے جاری ہے، جبکہ ان کے موبائل فونز میں پینک بٹن کی تنصیب بھی کی جا رہی ہے تاکہ کسی بھی ہنگامی صورتحال میں فوری مدد حاصل کی جا سکے۔

ذرائع کے مطابق پولیس، سیف سٹی اور ہوم ڈیپارٹمنٹ کے مشترکہ ایکشن پلان پر تیزی سے عملدرآمد جاری ہے۔ لاہور سمیت اب تک ایک لاکھ 82 ہزار سے زائد اساتذہ اس سہولت سے مستفید ہو چکے ہیں، جبکہ صوبے بھر کے 3 لاکھ سے زائد اساتذہ کو سیف سٹی نیٹ ورک سے منسلک کرنے کا ہدف مقرر کیا گیا ہے۔

حکام کا کہنا ہے کہ آئندہ چند ماہ میں تمام اساتذہ کو اس جدید سکیورٹی نظام کا حصہ بنا دیا جائے گا۔ اس کے ساتھ ساتھ اے کیٹیگری اسکولز کے سی سی ٹی وی کیمرے بھی سیف سٹی سے لنک کر دیے گئے ہیں

نئے نظام کے تحت تعلیمی اداروں میں سکیورٹی کو مزید مؤثر بنایا جائے گا اور اساتذہ محض ایک بٹن دبا کر فوری مدد حاصل کر سکیں گے۔